കണ്ണൂര് : മാവേലി എക്സ്പ്രസില് യാത്രക്കാരനെ പോലീസ് ക്രൂരമായി മര്ദിച്ച സംഭവത്തില് മനുഷ്യാവകാശ കമ്മീഷന് സ്വമേധയാ കേസെടുത്തു. അന്വേഷണം നടത്തി ഒരാഴ്ചക്കകം റിപ്പോര്ട്ട് നല്കാന് കണ്ണൂര് സിറ്റി പോലീസ് കമ്മീഷണറോട് മനുഷ്യാവകാശ കമ്മീഷന് ജുഡീഷ്യല് അംഗം കെ. ബൈജുനാഥ് നിര്ദേശിച്ചു. കഴിഞ്ഞ ദിവസം രാത്രിയാണ് മാവേലി എക്സ്പപ്രസില് എ.എസ്.ഐ യാത്രക്കാരനെ മര്ദ്ദിച്ചത്.
കൃത്യമായ ടിക്കറ്റില്ലാതെ സ്ലീപ്പര് കോച്ചില് യാത്രചെയ്തുവെന്ന് ചൂണ്ടിക്കാട്ടിയായിരുന്നു മര്ദനം. ടിക്കറ്റ് പരിശോധിക്കേണ്ടത് ടി.ടി.ഇ ആണെന്നിരിക്കെയാണ് പോലീസുകാരന് ടിക്കറ്റ് ചോദിച്ചെത്തി സ്ലീപ്പര് കമ്പാര്ട്ട്മെന്റിലിരിക്കുകയായിരുന്ന യാത്രക്കാരനെ മര്ദ്ദിച്ചത്. ട്രെയിനില് യാത്ര ചെയ്യുകയായിരുന്ന മറ്റൊരു യാത്രക്കാരന് പകര്ത്തിയ മര്ദ്ദന ദൃശ്യങ്ങളാണ് ഇപ്പോള് സമൂഹ മാധ്യമങ്ങളിലൂടെ പുറത്ത് വന്നിരിക്കുന്നത്.
സ്ലീപ്പര് കമ്പാര്ട്ട്മെന്റിലേക്ക് പരിശോധനയുമായി എത്തിയ പോലീസ് ഉദ്യോഗസ്ഥന് യാത്രക്കാരനോട് ടിക്കറ്റ് ചോദിച്ചു. സ്ലീപ്പര് ടിക്കറ്റില്ലെന്നും ജനറല് ടിക്കറ്റ് മാത്രമേയുള്ളു എന്ന് യാത്രക്കാരന് മറുപടി നല്കി. കയ്യിലുള്ള ടിക്കറ്റ് എടുക്കാന് പോലീസുകാരന് ആവശ്യപ്പെട്ടു. ഇതനുസരിച്ച് ഇയാള് ബാഗില് ടിക്കറ്റ് തിരയുന്നതിനിടെയാണ് പോലീസുകാരന് ബൂട്ട് ഉപയോഗിച്ച് ചവിട്ടുകയും മര്ദ്ദിക്കുകയും ചെയ്തത്. തല്ലി വീഴ്ത്തുകയും നിലത്ത് വലിച്ചിട്ട് ബൂട്ട് കൊണ്ട് നെഞ്ചിന് ചവിട്ടുകയും ചെയ്തുവെന്ന് ദൃശ്യങ്ങള് പകര്ത്തിയ യാത്രക്കാരന് പറഞ്ഞു. മാവേലി എക്സ്പ്രസ് കണ്ണൂരില് നിന്ന് പുറപ്പെട്ട സമയത്താണ് മര്ദ്ദനമുണ്ടായത്.
