കണ്ണൂര് : ഭർതൃവീട്ടിലെ യുവതിയുടെ ആത്മഹത്യയില് ഭർത്താവും ഭർതൃമാതാവും പോലീസ് കസ്റ്റഡിയിൽ. കണ്ണൂർ പെരുവാമ്പ സ്വദേശി സൂര്യയുടെ ആത്മഹത്യയിലാണ് പയ്യന്നൂർ പോലീസ് ഇരുവരെയും കസ്റ്റഡിയിലെടുത്തത്. കരിവെള്ളൂർ കൂക്കാനത്തെ സി. രാകേഷ്, മാതാവ് ഇന്ദിര എന്നിവരാണ് കസ്റ്റഡിയിലുള്ളത്. ഗാർഹിക പീഡനമാണ് ആത്മഹത്യയിലേക്ക് നയിച്ചതെന്നാണ് പരാതി.
സൂര്യയുടെ ആത്മഹത്യക്ക് കാരണം ഭർത്താവിന്റെയും അമ്മയുടെയും പീഡനമാണെന്ന് കുടുംബം ആരോപിച്ചിരുന്നു. 24 വയസുള്ള സൂര്യ ഇക്കഴിഞ്ഞ മൂന്നിനാണ് ആത്മഹത്യ ചെയ്തത്. ഭർതൃവീട്ടിലെ നിരന്തര പീഡനമാണ് യുവതി ജീവനൊടുക്കാൻ കാരണമായതെന്ന് യുവതിയുടെ കുടുംബം പയ്യന്നൂർ പോലീസിൽ പരാതിയില് വ്യക്തമാക്കി. 2021-ലാണ് ഇവരുടെ വിവാഹം നടന്നത്. എട്ടുമാസം പ്രായമുള്ള ഒരു മകനുണ്ട്.
