ഡൽഹി : വി.ഡി സതീശനെ കേരളത്തിലെ കോൺഗ്രസ് ലെജിസ്ലേറ്റീവ് പാർട്ടി നേതാവായും മുഖ്യമന്ത്രിയായും നാമനിർദ്ദേശം ചെയ്ത ഹൈക്കമാൻഡ് തീരുമാനത്തെ സന്തോഷപൂർവം സ്വാഗതം ചെയ്യുന്നതായി കെ വി വേണുഗോപാൽ അറിയിച്ചു. കേരളത്തിലെ ജനങ്ങൾ വലിയ പ്രതീക്ഷയോടെ 102 സീറ്റുകളുടെ വൻ ഭൂരിപക്ഷം നൽകിയാണ് യുഡിഎഫിനെ അധികാരത്തിലേക്ക് എത്തിച്ചതെന്നും ആ പ്രതീക്ഷകൾക്കനുസരിച്ചുള്ള സർക്കാരിനും മുഖ്യമന്ത്രി വി.ഡി സതീശനും എല്ലാവിധ പിന്തുണയും നൽകുമെന്നും അദ്ദേഹം വ്യക്തമാക്കി. ഹൈക്കമാൻഡ് എന്ത് തീരുമാനമെടുത്താലും അത് പാർട്ടി പ്രവർത്തകർ ശിരസാവഹിക്കുമെന്ന് താൻ നേരത്തെ പറഞ്ഞിരുന്നതാണെന്നും, ഇപ്പോൾ ആ തീരുമാനം നടപ്പിലാക്കേണ്ട ഉത്തരവാദിത്തത്തിന്റെ ഭാഗമായി നിൽക്കാനാണ് ആഗ്രഹിക്കുന്നതെന്നും അദ്ദേഹം പറഞ്ഞു.
താൻ ഒരു അടിയുറച്ച കോൺഗ്രസുകാരനാണെന്നും ജീവിതത്തിലെ ഏറ്റവും വലിയ ആഗ്രഹം മരിക്കുമ്പോൾ ത്രിവർണ്ണ പതാക പുതപ്പിക്കണം എന്നതാണെന്നും അദ്ദേഹം വൈകാരികമായി പ്രതികരിച്ചു. സതീശന്റെ നേതൃത്വത്തിലുള്ള ഭരണത്തിന് തന്റെ ഭാഗത്തുനിന്ന് എല്ലാവിധ സഹായങ്ങളും ഉണ്ടാകുമെന്ന് അദ്ദേഹം ഉറപ്പുനൽകി.
