തിരുവനന്തപുരം : കേരളത്തിൽ യു.ഡി.എഫ് മികച്ച വിജയം കൈവരിച്ചതിന് പിന്നാലെ ജനങ്ങൾ ഏൽപ്പിച്ച വലിയ ഉത്തരവാദിത്വം പൂർണ്ണമായ അർപ്പണബോധത്തോടെ നിറവേറ്റുമെന്ന് നിയുക്ത മുഖ്യമന്ത്രി വി.ഡി. സതീശൻ വാർത്താസമ്മേളനത്തിൽ പറഞ്ഞു. 10 വർഷത്തെ ഭരണത്തിന് ശേഷം 102 സീറ്റുകൾ നൽകി അധികാരത്തിലേറ്റിയ ജനങ്ങളോട് പറഞ്ഞ കാര്യങ്ങൾ ഓരോന്നായി നടപ്പിലാക്കുമെന്നും അദ്ദേഹം വ്യക്തമാക്കി. കേരളത്തിന്റെ ജീവിതനിലവാരം ഉയർത്താനും ഒരു പുതിയ കേരളത്തെ സൃഷ്ടിക്കാനും ഒരു പുതുയുഗത്തിന് തുടക്കമിടാനും കഠിനാധ്വാനം ചെയ്യുമെന്ന് അദ്ദേഹം പറഞ്ഞു. രാഷ്ട്രീയ പ്രവർത്തനത്തിന്റെയും പൊതുപ്രവർത്തനത്തിന്റെയും നിർവചനം തന്നെ മാറ്റിയെഴുതുമെന്നും അദ്ദേഹം പറഞ്ഞു.
ഒരാൾക്ക് ഒറ്റയ്ക്ക് ഒന്നും ചെയ്യാൻ കഴിയില്ലെന്നും, നല്ലൊരു ടീമിനെ വാർത്തെടുക്കുക എന്നതാണ് തന്റെ പ്രധാന ഉത്തരവാദിത്വമെന്നും സതീശൻ വ്യക്തമാക്കി. കേരളത്തെ രക്ഷിക്കാനായി പ്രതിപക്ഷത്തിന്റെ ഉൾപ്പെടെ എല്ലാവരുടെയും പിന്തുണ അദ്ദേഹം അഭ്യർത്ഥിച്ചു. തന്റെ നിയമനത്തിന് പിന്നിൽ പ്രവർത്തിച്ച കോൺഗ്രസ് അധ്യക്ഷൻ, രാഹുൽ ഗാന്ധി, കെ.സി. വേണുഗോപാൽ, രമേശ് ചെന്നിത്തല തുടങ്ങിയ നേതാക്കളോടും കഠിനാധ്വാനം ചെയ്ത ലക്ഷക്കണക്കിന് യു.ഡി.എഫ് പ്രവർത്തകരോടും അദ്ദേഹം നന്ദി രേഖപ്പെടുത്തി.
