ഇടുക്കി: ജലനിരപ്പ് പരമാവധി സംഭരണശേഷിയോട് അടുത്തതിനെ തുടർന്ന് ഇടുക്കി അണക്കെട്ട് നാളെ തുറക്കും. റൂൾ കർവ് അനുസരിച്ച് നാളെ രാവിലെ പത്തുമണിയോടെ ഡാം തുറക്കുമെന്ന് മന്ത്രി കെ. കൃഷ്ണൻകുട്ടി അറിയിച്ചു. സെക്കന്ഡില് 50,000 ലീറ്റര് വെള്ളമാകും ഇടുക്കി അണക്കെട്ടിൽ നിന്നും ഒഴുക്കുക. പെരിയാറിന്റെ ഇരുകരകളിലുമുള്ളവർ ജാഗ്രത പാലിക്കണമെന്നും നിര്ദേശമുണ്ട്.2403 അടിയാണ് ഇടുക്കി ഡാമിന്റെ പരമാവധി സംഭരണ ശേഷി. വൃഷ്ടിപ്രദേശത്ത് ശക്തമായ മഴയായതിനാൽ കഴിഞ്ഞ പത്ത് ദിവസമായി ഡാമിലെ വെള്ളം ക്രമാതീതമായി ഉയരുന്നുണ്ട്. ഒപ്പം മുല്ലപ്പെരിയാർ അണക്കെട്ടിൽ നിന്നുള്ള അധിക ജലവും എത്തുകയാണ്. അണക്കെട്ടിൽ നേരത്തെ തന്നെ റെഡ് അലർട്ട് പുറപ്പെടുവിച്ചിരുന്നു.
