കോഴിക്കോട്: ഇര്ഷാദിനും ദീപകിനും പിന്നാലെ കോഴിക്കോട് ജില്ലയില് നിന്നുള്ള മറ്റൊരു യുവാവിന്റെ തിരോധാനത്തിലും സ്വര്ണക്കടത്ത് സംഘമെന്ന് സംശയം.ചെക്യാട്ട് നിന്ന് യുവാവിനെ കാണാതായ സംഭവത്തിനും സ്വര്ണ്ണക്കടത്തുമായി ബന്ധമെന്ന് സംശയം. ഖത്തറില് ജോലി ചെയ്തിരുന്ന ചെക്യാട് വാതുക്കല് പറമ്പത്ത് റിജേഷ്( 35) നെയാണ് ജൂണ് 16 മുതല് കാണാതായത്. ബന്ധുക്കളുടെ പരാതിയില് പോലീസ് അന്വേഷണം തുടങ്ങി.
ജൂണ് പത്തിന് ബന്ധുക്കളെ വിളിച്ച റിജേഷ് ജൂണ് 16 ന് കണ്ണൂര് എയര്പോര്ട്ട് വഴി നാട്ടില് എത്തുമെന്ന് അറിയിച്ചിരുന്നു. എന്നാല് അതിനു ശേഷം ഇയാളെക്കുറിച്ച് യാതൊരു വിവരവും ഇല്ലാതെയായി. ഖത്തറിലെ സുഹൃത്തുകളെ വിളിച്ചപ്പോള് നാട്ടില് പോയെന്നാണ് അറിയിച്ചത്. ഇതിനിടയില് അജ്ഞാതര് പല ചവണ റിജേഷിനെ അന്വേഷിച്ച് വീട്ടിലെത്തിയതോടെ വീട്ടുകാരുടെ സംശയം കൂടി. ഇതോടെയാണ് പരാതിയുമായി ഇവര് പോലീസിനെ സമീപിച്ചത്.
റിജേഷിന്റെ മാതാപിതാക്കളുടെ പരാതിയില് വളയം പോലീസ് കേസ്സെടുത്ത് അന്വേഷണം തുടങ്ങിയിട്ടുണ്ട്. അജ്ഞാതര് അന്വേഷിച്ചെത്തിയത് റിജേഷ് വഴി കടത്തിയ സ്വര്ണ്ണത്തിന് വേണ്ടിയാണെന്നാണ് പോലീസ് കരുതുന്നത്. സ്വര്ണക്കടത്ത് സംഘം തട്ടിക്കൊണ്ടു പോയ ശേഷം കൊല്ലപ്പെട്ട ഇര്ഷാദിന്റെ വാര്ത്ത പുറത്ത് വന്ന ശേഷമാണ് ബന്ധുക്കള് സംഭവത്തിന്റെ ഗൗരവം മനസ്സിലാക്കി പോലീസിന് മുന്പാകെ എത്തിയത്.
റിജേഷിനെ കാണാതായ സംഭവത്തില് മൂന്ന് സാധ്യതകളാണ് പോലീസ് പ്രധാനമായും പരിശോധിക്കുന്നത്. ഒന്നെങ്കില് നാട്ടിലെത്തിയ റിജേഷിനെ പൊട്ടിക്കല് സംഘം പിടികൂടിയിരിക്കാം അല്ലെങ്കില് തട്ടിക്കൊണ്ടു പോയതാവാം. അതുമല്ലെങ്കില് സ്വര്ണം കൈക്കലാക്കാന് വേണ്ടി റിജേഷ് സ്വയം മാറി നിന്നതുമാവാം. റിജേഷിന്റെ യാത്രാ വിവരങ്ങള് അടക്കം ശേഖരിച്ച് ദുരൂഹത നീക്കാനുള്ള ശ്രമത്തിലാണ് പോലീസ്. ഇയാളുടെ വീട്ടിലെത്തിയവരെക്കുറിച്ചുള്ള വിവരങ്ങളും പോലീസ് ശേഖരിച്ചു വരികയാണ്. ഒന്നരമാസത്തിലേറെയായി റിജേഷിനെ കാണാതായിട്ടെങ്കിലും ഭീഷണി കാരണമാണ് പരാതി നല്കാതിരുന്നതെന്നാണ് ഇയാളുടെ ബന്ധുക്കളുടെ വിശദീകരണം.
