കട്ടപ്പന; അനുമോളുടെ കൊലപാതകത്തില്‍ കൂടുതല്‍ വിവരങ്ങള്‍ പുറത്ത്. അനുമോള്‍ കയ്യില്‍ സൂക്ഷിച്ചിരുന്ന പണം ഭര്‍ത്താവ് വാങ്ങി ചെലവാക്കിയതു മുതല്‍ മദ്യപിച്ച് വീട്ടുകാര്യങ്ങള്‍ നോക്കാതെ നടക്കുന്നതു വരെയുള്ള കാര്യങ്ങള്‍ കൊലയ്ക്കു കാരണമായി. മാര്‍ച്ച് 11ന് കട്ടപ്പന വനിതാ സെല്ലില്‍ ഭര്‍ത്താവ് ബിജേഷിന് എതിരെ അനുമോള്‍ പരാതി നല്‍കിയിരുന്നു. സ്‌കൂളില്‍നിന്നു പിരിച്ചെടുത്ത് അനുമോള്‍ കൈവശം സൂക്ഷിച്ചിരുന്ന 10,000 രൂപയോളം ബിജേഷ് വാങ്ങിക്കൊണ്ടുപോയശേഷം തിരികെ നല്‍കാത്തതും, തന്നെ വേണ്ടെന്നു പറഞ്ഞ് ഇറങ്ങിപ്പോയശേഷം മടങ്ങിവന്നതുമെല്ലാം അനുമോള്‍ പറഞ്ഞെന്നാണു പ്രതിയുടെ മൊഴി. ഇതുമായി ബന്ധപ്പെട്ടുള്ള വാക്കേറ്റത്തിന് ഒടുവിലായിരുന്നു കൊല നടത്തിയത്.
മാര്‍ച്ച് 21നാണ് അനുമോള്‍ വീടിനുള്ളില്‍ മരിച്ച നിലയില്‍നിന്ന് കണ്ടെത്തുന്നത്. മൃതദേഹം പുതപ്പിനുള്ളില്‍ പൊതിഞ്ഞുവെച്ച നിലയിലായിരുന്നു. അനുമോളെ കാണാനില്ലെന്ന് വീട്ടുകാര്‍ പരാതി നല്‍കിയതിന് പിന്നാലെ ഭര്‍ത്താവ് വിജേഷ് ഒളിവില്‍ പോവുകയും ചെയ്തു.
