ഏനാദിമംഗലം : ഓറഞ്ചും മഞ്ഞയും നിറത്തിൽ സൗന്ദര്യം നിറച്ച് നിറഞ്ഞ് നിൽക്കുന്ന ചെണ്ടുമല്ലിപ്പൂക്കൾ ഇളമണ്ണൂർ വൊക്കേഷണൽ ഹയർ സെക്കൻഡറി സ്കൂളിന്റെ ആകർഷണമാണ്. കെ.പി റോഡിൽനിന്ന് സ്കൂളിലേക്കെത്തുമ്പോൾ തന്നെ സ്കൂളിന്റെ അങ്കണത്തിൽ ആദ്യം കാണുന്നത് ഈ പൂമുറ്റമാണ്. സ്കൂളിലെ എൻ.എസ്.എസ്.യൂണിറ്റാണ് ചിങ്ങത്തിരുവോണത്തിന് സ്കൂളിന്റെ ചെണ്ടുമല്ലി എന്ന പദ്ധതി ഏനാദിമംഗലം കൃഷിഭവന്റെ സഹകരണത്തോടെ സ്കൂളിൽ നടപ്പാക്കിയത്. സ്കൂളിനോട് ചേർന്നുള്ള അമ്പത് സെന്റ് സ്ഥലത്താണ് ഇതിനായി അധ്യാപകരും വിദ്യാർഥികളും ചേർന്ന് സ്ഥലം ക്രമീകരിച്ച് ഒരുക്കിയത്. ജൂൺ മാസം പതിനാലാംതീയതിയാണ് ഇവിടെ ചെണ്ടുമല്ലി കൃഷി ആരംഭിച്ചത്. സ്കൂളിലെ പഠനത്തിന് ശേഷം എൻ.എസ്.എസ്. വൊളന്റിയർമാരും മറ്റ് കുട്ടികളും അധ്യാപകരും ചേർന്നാണ് ഇതിനെ പരിപാലിച്ചത്.
ചിങ്ങപ്പുലരിയിൽ തന്നെ ഇതിന്റെ വിളവെടുപ്പിന് ഒരുക്കിയ സന്തോഷത്തിലാണ് കുട്ടികളെന്ന് സ്കൂൾ മാനേജർ കെ.ആർ.ഹരീഷ്, എൻ.എസ്.എസ്. ക്ലസ്റ്റർ കോഡിനേറ്റർ എൻ.കെ.സതികുമാർ, സ്കൂൾ കോഡിനേറ്റർ ആർ.എസ്.രാജലക്ഷ്മി എന്നിവർ പറഞ്ഞു. വിദ്യാർഥി പ്രതിനിധികളായ ആർ.അരവിന്ദ്, വി.വിഷ്ണു, ആർ.അർജുൻ കൃഷ്ണ, എസ്.സ്നേഹ, സരിതമോൾ എന്നിവരാണ് ചെണ്ടുമല്ലി കൃഷിക്ക് നേതൃത്വം നൽകിയത്. സ്കൂളിലെ ചെണ്ടുമല്ലി കൃഷി ഇപ്പോൾ നാട്ടിലും ഹിറ്റാണ്. ഈ പൂമുറ്റം കാണുന്നതിനായും ധാരാളം ആളുകൾ സ്കൂളിലേക്ക് എത്തുന്നുണ്ട്. ഏനാദിമംഗലം കൃഷിഭവനാണ് സ്കൂളിൽ ചെണ്ടുമല്ലി കൃഷിക്കായി തൈകൾ നൽകിയത്.
