മൂവാറ്റുപുഴ: മൂവാറ്റുപുഴ മേഖലയില് കുന്നിടിക്കലും മണ്ണെടുപ്പും വ്യാപകമായതോടെ നടപടിയുമായി റവന്യൂവകുപ്പ് രംഗത്ത്. കഴിഞ്ഞദിവസം കൂടിയ വികസനസമിതിയോഗത്തില് മൂവാറ്റുപുഴ മേഖലയിലെ അനധികൃത മണ്ണെടുപ്പ് സംബന്ധിച്ച പരാതി ഉയര്ന്നപ്പോള് ശക്തമായ നടപടി സ്വീകരിക്കുമെന്ന് ജില്ലാ കളക്ടര് ജാഫര്മാലിക് ജനപ്രതിനിധികള്ക്ക് ഉറപ്പ് നല്കിയിരുന്നു. ഇന്നലെ വാളകം വില്ലേജിലെ മേക്കടമ്പ് – കടാതി റോഡില് കെ.പി.സി റോഡിന്റെ കിഴക്കുവശത്തുള്ള ഭൂമിയില്നിന്ന് അനധികൃതമായി മണ്ണെടുത്തുകൊണ്ടിരുന്ന 3 ടിപ്പര് ലോറികളും ജെ.സി.ബിയും മൂവാറ്റുപുഴ എല്.ആര്. തഹസില്ദാരുടെ നേതൃത്വത്തിലുള്ള സ്ക്വാഡ് പിടിച്ചെടുത്തു. ഇവ പോലീസിന് കൈമാറി. അനധികൃത മണ്ണെടുപ്പ് ശ്രദ്ധയില്പ്പെട്ടാല് താലൂക്ക് ഓഫീസില് അറിയിക്കണമെന്നും എല്.ആര് തഹസില്ദാര് അറിയിച്ചു.
