രാമനാട്ടുകര : വാഹനപാർക്കിങ് നിരോധിച്ച് സിറ്റി ട്രാഫിക് പോലീസ് ബോർഡുവെച്ച സ്ഥലത്ത് അപകടമുണ്ടാക്കുന്ന വിധത്തിൽ അനധികൃത വാഹന പാർക്കിങ്. രാമനാട്ടുകര ബസ് സ്റ്റാൻഡിനു മുന്നിൽ ദേശീയപാതയിലാണ് നിയമലംഘനം. വാഹനം നിർത്തിയിടുന്നതു മൂലം അപകടമുണ്ടായതിനാലാണ് വർഷങ്ങൾക്കു മുമ്പ് രാമനാട്ടുകര ബസ് സ്റ്റാൻഡിനു മുന്നിൽ ദേശീയപാതയിൽ ട്രാഫിക് പോലീസ് നോ പാർക്കിങ് ബോർഡ് സ്ഥാപിച്ചത്.
ചില ഇരുചക്ര വാഹന ഉടമകൾ പുലർച്ചെ മുതൽ രാത്രി വൈകുന്നതു വരെ ഇവിടെ വാഹനം നിർത്തിട്ട് ഗതാഗതം തടസ്സപ്പെടുത്തുകയാണ്. ബസ് സ്റ്റാൻഡിന്റെയും ഷോപ്പിങ് കോംപ്ലക്സിലെയും പ്രവേശന കവാടങ്ങൾ തടസ്സപ്പെടുത്തിയാണ് ഈ അനധികൃത വാഹന പാർക്കിങ്. ഏറ്റവും തിരക്കുള്ള ഇവിടെ ഈ വാഹനങ്ങളുടെ ഇടയിലൂടെ വേണം ജനങ്ങൾ റോഡ് മുറിച്ചു കടന്ന് ബസ് സ്റ്റാൻഡിലേക്കു പോകാൻ.
