മല്ലപ്പള്ളി: വെണ്ണിക്കുളം ജംങ്ഷനിലെ ബസ് സ്റ്റോപ്പിൽ തുടരുന്ന അനധികൃത വാഹന പാർക്കിങ് ഒഴിവാക്കാൻ അധികൃതർ നടപടി സ്വീകരിക്കുന്നില്ലെന്ന് പരാതി. കടുത്ത ഗതാഗതക്കുരുക്ക് അനുഭവപ്പെടുന്ന ജംങ്ഷനിൽ അപകടങ്ങൾ നിത്യസംഭവമായി മാറുകയാണ്. കോട്ടയം റോഡിലെ ബസ് സ്റ്റോപ്പിലാണ് ഏറ്റവും കൂടുതൽ ദുരിതം. ഇവിടെ റോഡിന്റെ വശങ്ങൾ സ്വകാര്യ വാഹനങ്ങൾ കയ്യടക്കുന്നതോടെ ബസുകൾ റോഡിന് നടുവിൽ നിർത്തി യാത്രക്കാരെ കയറ്റുകയും ഇറക്കുകയും ചെയ്യേണ്ടി വരുന്നു. ഇത് മറ്റ് വാഹനങ്ങളുടെ യാത്ര തടസ്സപ്പെടുത്തുന്നതിനൊപ്പം വലിയ ഗതാഗതക്കുരുക്കിനും കാരണമാകുന്നുണ്ട്. നേരത്തെ ഇവിടെ സ്ഥാപിച്ചിരുന്ന നോ പാർക്കിങ് ബോർഡുകളും ബസ് സ്റ്റോപ്പ് ബോർഡുകളും നിലവിൽ കാണാനില്ലാത്ത അവസ്ഥയാണ്.
താലൂക്ക് വികസന സമിതി യോഗങ്ങളിൽ വെണ്ണിക്കുളത്തെ ഗതാഗത പ്രശ്നങ്ങൾ പലതവണ ചർച്ചയായിട്ടുണ്ടെങ്കിലും എടുത്ത തീരുമാനങ്ങളൊന്നും നടപ്പിലായിട്ടില്ലെന്ന് നാട്ടുകാർ ആരോപിക്കുന്നു. കോഴഞ്ചേരി, കോട്ടയം, തിരുവല്ല, റാന്നി ഭാഗങ്ങളിൽ നിന്നുള്ള വാഹനങ്ങൾ എത്തുന്ന ജംങ്ഷനിൽ കൃത്യമായ നിയന്ത്രണങ്ങളില്ലാത്തത് അപകടസാധ്യത വർദ്ധിപ്പിക്കുകയാണ്. അധികൃതരുടെ അനാസ്ഥ തുടരുന്നതിൽ പ്രതിഷേധം ശക്തമാണ്.
