തിരുവനന്തപുരം : സിപിഎം നേതൃത്വത്തിനെതിരെ രൂക്ഷവിമർശനവുമായി ജി സുധാകരൻ. കേരളത്തിൽ നിലവിലുണ്ടായ ഭരണത്തിനെതിരായ ജനവിധിയാണ് തിരഞ്ഞെടുപ്പിൽ ഉണ്ടായതെന്ന് അദ്ദേഹം തുറന്നടിച്ചു. സിപിഎം നേതൃത്വത്തിലുള്ള ചില ആളുകളുടെ തെറ്റായ നിലപാടുകളും അഹങ്കാരവുമാണ് ഇത്തരമൊരു പരാജയത്തിന് വഴിവെച്ചതെന്ന് അദ്ദേഹം പറഞ്ഞു. ആലപ്പുഴയിൽ കഴിഞ്ഞ തവണ ഒരു സീറ്റുണ്ടായിരുന്ന യുഡിഎഫ് ഇത്തവണ ആറ് സീറ്റുകൾ നേടി തരംഗമുണ്ടാക്കിയത് ജനങ്ങൾ ഭരണത്തിനെതിരായി ചിന്തിച്ചതുകൊണ്ടാണെന്ന് അദ്ദേഹം വിലയിരുത്തി.
പാർട്ടിയിൽ ചർച്ചയാകുന്ന ‘ശൈലി മാറ്റം’ കൊണ്ട് മാത്രം പ്രശ്നങ്ങൾ അവസാനിക്കില്ലെന്ന് അദ്ദേഹം പരിഹസിച്ചു. ഈ രീതികൾ മുഴുവൻ മാറ്റണമെന്നും അവർക്ക് അതിന് കഴിയുമോ എന്നത് “ദൈവം തമ്പുരാന് അറിയാം” എന്നും അദ്ദേഹം പറഞ്ഞു. പാർട്ടിയുടെ ആഭ്യന്തര കാര്യങ്ങളെക്കുറിച്ചുള്ള ചോദ്യങ്ങൾക്ക്, താൻ ഇപ്പോൾ പിബിയിൽ (പോളിറ്റ് ബ്യൂറോ) ഇല്ലാത്തതിനാൽ തന്നോട് ചോദിക്കേണ്ടതില്ല എന്ന നിലപാടാണ് അദ്ദേഹം സ്വീകരിച്ചത്.
