ഇടുക്കി : മൂന്നാറിൽ ഓട്ടോ ഡ്രൈവർ കൊല്ലപ്പെട്ട ഭാഗത്ത് വീണ്ടും കാട്ടാനക്കൂട്ടമെത്തി. ഇന്നലെ വൈകിട്ടാണ് കാട്ടാനക്കൂട്ടം കന്നിമല ടോപ്പ് ഡിവിഷൻ ഭാഗത്തിറങ്ങിയത്. കൂട്ടത്തിൽ മൂന്ന് ആനകളുണ്ടായിരുന്നുവെന്ന് പ്രദേശവാസികൾ പറഞ്ഞു. സുരേഷ് കുമാർ കൊല്ലപ്പെട്ടതിനു ശേഷം ആർ ആർ ടി നിരീക്ഷണം ശക്തമാക്കി എന്ന് പറഞ്ഞതിനു പിന്നാലെയാണ് കാട്ടാനകൾ എത്തിയിരിക്കുന്നത്. വനംവകുപ്പ് പ്രശ്നം പരിഹരിക്കാനുള്ള നീക്കങ്ങൾ ശക്തമാക്കാത്തതാണ് വന്യമൃഗ ശല്യം പ്രദേശത്ത് വർദ്ധിച്ചു വരുന്നതിന് കാരണമെന്നും പ്രദേശവാസികൾ ആരോപിച്ചു.
കഴിഞ്ഞ ദിവസമാണ് ഓട്ടോറിക്ഷയിൽ വരികയായിരുന്ന സുരേഷ് കുമാറിനും കുടുംബത്തിനും നേരെ കാട്ടാന പാഞ്ഞടുത്തത്. ആനയുടെ ആക്രമണത്തിൽ സുരേഷ് കൊല്ലപ്പെടുകയും വാഹനത്തിലുണ്ടായിരുന്ന മറ്റു രണ്ട് പേർക്ക് പരിക്കേൽക്കുകയും ചെയ്തിരുന്നു. ഇവർ ആശുപത്രിയിൽ ചികിത്സയിൽ കഴിയുകയാണ്.
