ന്യൂഡല്ഹി : സ്ത്രീകളില് കാണപ്പെടുന്ന ഗര്ഭാശയഗള (Cervical cancer) അര്ബുദത്തെ പ്രതിരോധിക്കാന് ഇന്ത്യ പുതിയ വാക്സിന് വികസിപ്പിച്ചു. സിറം ഇന്സ്റ്റിറ്റ്യൂട്ടും ബയോടെക്നോളജി വകുപ്പും ചേര്ന്ന് ‘ക്വാഡ്രിലന്ഡ് ഹ്യൂമന് പാപ്പിലോമ വൈറസ് വാക്സിന്-സെര്വാവാക്’ (ക്യൂ.എച്ച്.പി.വി.) എന്ന വാക്സിനാണ് വികസിപ്പിച്ചത്. ശാസ്ത്രസാങ്കേതിക സഹമന്ത്രി ഡോ.ജിതേന്ദ്ര സിങ്ങാണ് പ്രഖ്യാപിച്ചത്. ഉടന് വിപണിയിലെത്തുന്ന വാക്സിന് 200-400 രൂപയാണ് വില. 90 ശതമാനം ഫലപ്രാപ്തിയാണ് വാക്സിന് അവകാശപ്പെടുന്നത്.
ഒമ്പതുമുതല് പതിനാലുവരെ വയസ്സുള്ള പെണ്കുട്ടികളിലാണ് കുത്തിവെക്കുക. ആദ്യഡോസ് ഒമ്പതാം വയസ്സിലും അടുത്ത ഡോസ് തുടര്ന്നുള്ള 6-12 മാസത്തിനിടയിലുമാണ് കുത്തിവെക്കേണ്ടത്. പതിനഞ്ചുവയസ്സിനു മുകളിലുള്ളവരാണെങ്കില് മൂന്ന് ഡോസ് വാക്സിന് സ്വീകരിക്കണം. വാക്സിന് സ്വീകരിച്ചവരില് വേദന, തടിപ്പ്, ചൊറിച്ചില് എന്നിവയുണ്ടാകാന് സാധ്യതയുണ്ട്. പനി, ശരീരവേദന, തലവേദന, ഛര്ദി ഉണ്ടാവാം അതിനാല് സാംക്രമികരോഗങ്ങള്, അലര്ജി മുതലായ അസുഖമുള്ളവര് വാക്സിന് സ്വീകരിക്കരുത്.