ന്യൂഡല്ഹി: ഇന്ന് നടക്കേണ്ടിയിരുന്ന വേള്ഡ് ചാമ്പ്യന്ഷിപ്പ് ഓഫ് ലെജന്ഡ്സിലെ ഇന്ത്യ-പാകിസ്താന് മത്സരം റദ്ദാക്കി. ഇന്ത്യന് ക്രിക്കറ്റ് താരം ശിഖര് ധവാനും മറ്റ് നിരവധി താരങ്ങളും പിന്മാറിയതിനെ തുടര്ന്നാണിത്. ഇംഗ്ലണ്ടിലെ ബര്മിങ്ഹാമില് ഇന്ന് നടക്കേണ്ട മത്സരമാണ് റദ്ദാക്കിയത്. പാകിസ്താനെതിരെ കളിക്കില്ലെന്ന് ശിഖര് ധവാന് സാമൂഹിക മാധ്യമങ്ങളിലൂടെ അറിയിച്ചിരുന്നു. പാകിസ്താനെതിരെ കളിക്കില്ലെന്ന തന്റെ തീരുമാനം അറിയിച്ചുകൊണ്ട് സംഘാടകര്ക്ക് എഴുതിയ കത്ത് ധവാന് സോഷ്യല് മീഡിയയിലൂടെ പങ്കുവെക്കുകയും ചെയ്തു. അതിര്ത്തിയില് ഇരു രാജ്യങ്ങളും തമ്മില് നിലനില്ക്കുന്ന സംഘര്ഷങ്ങളുടെയും, പ്രത്യേകിച്ച് പഹല്ഗാം ഭീകരാക്രമണത്തിന്റെയും പശ്ചാത്തലത്തിലാണ് ഈ തീരുമാനം. മറ്റു ചില ഇന്ത്യന് താരങ്ങളും പാകിസ്താനെതിരെ കളിക്കില്ലെന്ന് ഭീഷണി മുഴക്കിയിരുന്നു.
‘ഇന്ത്യ-പാകിസ്താന് മത്സരം (ജൂലൈ 20, ഞായറാഴ്ച, വൈകുന്നേരം 4.30) റദ്ദാക്കി. സ്റ്റേഡിയം അടച്ചിടുന്നതിനാല് ദയവായി ആരും വരരുത്. ടിക്കറ്റ് എടുത്ത എല്ലാവര്ക്കും മുഴുവന് തുകയും തിരികെ നല്കുന്നതാണ്’ സംഘാടകര് അറിയിച്ചു.ഇന്ത്യ-പാക് മത്സരത്തിനെതിരെ സാമൂഹികമാധ്യമങ്ങളില് കടുത്ത ഭാഷയിലാണ് ആരാധകര് പ്രതികരിച്ചിരുന്നത്. പാകിസ്താനെതിരേ കളിക്കരുതെന്ന ആവശ്യമാണ് പ്രധാനമായും ഉന്നയിക്കപ്പെടുന്നത്. കുറ്റവാളികള്ക്കൊപ്പം എന്തിനാണ് കളിക്കുന്നതെന്നടക്കം രൂക്ഷമായ പ്രതികരണങ്ങളും ഉയര്ന്നിരുന്നു. ഇരുരാജ്യങ്ങളിലെയും പ്രധാന മുന് താരങ്ങള് ടീമിലുണ്ടായിരുന്നു. യുവ്രാജ് സിങ്ങാണ് ഇന്ത്യയെ നയിക്കുന്നത്. സുരേഷ് റെയ്ന, മുഹമ്മദ് കൈഫ്, ഇര്ഫാന് പഠാന്, റോബിന് ഉത്തപ്പ, ഹര്ഭജന് സിങ് തുടങ്ങിയ താരങ്ങള് ഇന്ത്യന് സംഘത്തിലുണ്ട്.
