ന്യൂയോർക്ക് : യുഎസിൽ ഇന്ത്യൻ വംശജരായ ദമ്പതികളും അവരുടെ മകളും മരിച്ച നിലയിൽ. രാകേഷ് കമൽ (57), ഭാര്യ ടീന (54), മകൾ അരിയാന (18) എന്നിവരെയാണ് മസാച്യു സെസ്റ്റിലെ അവരുടെ ആഡംബര വസതിയിൽ മരിച്ച നിലയിൽ കണ്ടെത്തിയത്. പ്രാദേശിക സമയം വ്യാഴാഴ്ച രാത്രി 7.30 ഓടെയാണ് ഡോവർ മാൻഷണിൽ മൃതദേഹങ്ങൾ കണ്ടെത്തിയതെന്ന് നോർഫോക് ഡിസ്ട്രിക് അന്റോർണി മൈക്കൽ മോറിസൈ അറിയിച്ചു. അഞ്ചുമില്യൻ ഡോളർ വിലവരുന്നതാണ് ഇവരുടെ കൊട്ടാര സാദൃശ്യ
മായ വീട്. കുടുംബ പ്രശ്നങ്ങളാണ് മരണത്തിലേക്ക് നയിച്ചത് എന്ന് സംശയമുണ്ട്. രാകേഷിന്റെ മൃതദേഹത്തിന് സമീപത്തുനിന്നും ഒരു തോക്ക് കണ്ടെടുത്തിട്ടുണ്ട്. എന്നാൽ ആരാണ് കൊലപാതകം നടത്തിയതെന്ന് പോലീസ് വ്യക്തമാക്കിയിട്ടില്ല. രാകേഷും ഭാര്യയും ചേർന്ന് മുൻപ് വിദ്യാഭ്യാസ സ്ഥാപനമായ എഡ്യൂനോവ നടത്തിയിരുന്നു. കുറച്ചുകാലമായി ഇതിന്റെ പ്രവർത്തനം നിലച്ചിരിക്കുകയാണ്. കുടുംബം കുറച്ചുകാലമായി സാമ്പത്തിക പ്രതിസന്ധി നേരിട്ടിരുന്നുവെന്ന് ബന്ധുക്കൾ പറയുന്നു. രണ്ടുദിവസമായി ഫോണിൽ ബന്ധപ്പെടാൻ കഴിയാതെ വന്നതോടെ വീട്ടിൽ അന്വേഷിച്ച് എത്തിയ ബന്ധുവാണ് വിവരം പോലീസിനെ അറിയിച്ചത്.
