പത്തനംതിട്ട : പത്തനംതിട്ട കോളേജ് ജംഗ്ഷനില് നിന്നും മണ്ണാറമല ക്ഷേത്രം ഭാഗത്തേക്ക് പോകുന്ന റോഡ് തകര്ന്നത് യാത്രാദുരിതം സൃഷ്ടിക്കുന്നു. റോഡ് തുടങ്ങുന്ന ഭാഗമാണ് ഏറെയും തകര്ന്നുകിടക്കുന്നത്. കഴിഞ്ഞ ദിവസങ്ങളില് ശക്തമായി മഴ പെയ്തതോടെ വലിയ കുഴികള് രൂപപ്പെട്ട റോഡില് ചെളിവെള്ളവും നിറഞ്ഞു. എം.പി ഓഫീസിലേക്ക് പോകുന്നതിനും ഈ റോഡാണ് ഉപയോഗിക്കുന്നത്. കൂടാതെ സ്കൂളുകളും വ്യാപാരസ്ഥാപനങ്ങളും നിരവധി വീടുകളും റോഡിന് ഇരുവശത്തുമായുണ്ട്. നൂറുകണക്കിന് വാഹനങ്ങള് ഈ വഴി കടന്നുപോകുന്നുണ്ട്. ഇരുചക്ര വാഹനയാത്രക്കാരാണ് റോഡിലെ കുഴി മൂലം കൂടുതല് ദുരിതമനുഭവിക്കുന്നത്. ഒട്ടേറെ ഇരുചക്രവാഹന യാത്രക്കാര് റോഡിലെ കുഴിയില് ഇതിനോടകം വീണുകഴിഞ്ഞു.
റോഡിന് ഓടയില്ലാത്തതാണ് പ്രധാന പ്രശ്നം. മഴക്കാലത്ത് വിവിധ ഭാഗങ്ങളില് നിന്നും ഒഴുകിയെത്തുന്ന വെള്ളം റോഡില് എത്തിയാല് ഒഴുകിപ്പോകാന് ഇടമില്ലാതെ പലയിടത്തും കെട്ടിക്കിടക്കും. ഇതാണ് റോഡ് തകര്ച്ചയ്ക്ക് പ്രധാന കാരണമായി ജനങ്ങള് ചൂണ്ടിക്കാട്ടുന്നത്. റോഡിലെ വെള്ളക്കെട്ട് മൂലം ഈ വഴിയുള്ള കാല്നട യാത്രയും ഏറെ ദുഷ്കരമാണ്. പത്തനംതിട്ട നഗരത്തിലെ പ്രധാന റോഡുകളിലൊന്നായിരുന്നിട്ടും തകര്ന്നുകിടക്കുന്ന റോഡിന്റെ അറ്റകുറ്റപ്പണികള് വൈകുന്നുവെന്നാണ് ജനങ്ങളുടെ പരാതി.
