വാഷിംഗ്ടൺ ഡിസി: ന്യൂയോർക്ക് സിറ്റി മേയറായി ഇന്ത്യൻ വംശജനായ സൊഹ്റാൻ മംദാനി ചരിത്രവിജയം നേടിയതിന് പിന്നാലെ അമേരിക്കൻ ഭരണസിരാകേന്ദ്രത്തിലും ഒരു ഇന്ത്യക്കാരി നിർണായക സ്ഥാനത്തേക്ക് മത്സരിക്കുന്നു. വാഷിംഗ്ടൺ ഡിസിയുടെ മേയർ സ്ഥാനത്തേക്കാണ് തമിഴ്നാട്ടിൽ ജനിച്ച 31 വയസുകാരിയായ റിനി സമ്പത്ത് ഡെമോക്രാറ്റിക് പാർട്ടിയുടെ സ്ഥാനാർഥിയായി ജനവിധി തേടുന്നത്. വാഷിംഗ്ടൺ ഡിസിയുടെ ചരിത്രത്തിൽ മേയർ പ്രൈമറി ബാലറ്റിൽ ഇടംനേടുന്ന ആദ്യ ദക്ഷിണേഷ്യൻ സ്ഥാനാർഥി എന്ന നേട്ടവും ഇവർ സ്വന്തമാക്കി കഴിഞ്ഞു.
തമിഴ്നാട്ടിലെ തേനിയിലാണ് റിനി സമ്പത്തിന്റെ ജനനം. തന്റെ ഏഴാമത്തെ വയസിൽ മാതാപിതാക്കൾക്കൊപ്പം അവർ അമേരിക്കയിലേക്ക് കുടിയേറി. കഴിഞ്ഞ പത്ത് വർഷത്തിലധികമായി വാഷിംഗ്ടൺ ഡിസിയിലാണ് റിനിയുടെ താമസം. യൂണിവേഴ്സിറ്റി ഓഫ് സതേൺ കാലിഫോർണിയയിൽ നിന്ന് വിദ്യാഭ്യാസം പൂർത്തിയാക്കിയ ഇവർ 2015ൽ ക്യാമ്പസിലെ വിദ്യാർഥി യൂണിയൻ പ്രസിഡന്റായി തെരഞ്ഞെടുക്കപ്പെട്ടതോടെയാണ് ആദ്യമായി ശ്രദ്ധിക്കപ്പെടുന്നത്. ഡിലോയിറ്റ്, ആക്സെഞ്ചർ തുടങ്ങിയ പ്രമുഖ സ്ഥാപനങ്ങളിൽ ജോലി ചെയ്ത ഇവർ, നിലവിൽ ഒരു ഗവൺമെന്റ് കോൺട്രാക്റ്ററും സൈബർ സുരക്ഷാ വിദഗ്ദ്ധയുമായി സേവനമനുഷ്ഠിക്കുകയാണ്.
