ഫുക്കറ്റ് : തീരദേശ വിനോദസഞ്ചാര കേന്ദ്രമായ തായ്ലൻഡിലെ ഫുക്കറ്റിൽ ഒരു കഫേയിൽ ഭക്ഷണം കഴിച്ചുകൊണ്ടിരുന്ന ഇന്ത്യൻ വിനോദസഞ്ചാരികൾ ദുരൂഹ സാഹചര്യത്തിൽ കുഴഞ്ഞുവീണു. സംഭവത്തിൽ ഒരാൾ മരിക്കുകയും മൂന്നുപേരെ ആശുപത്രിയിൽ പ്രവേശിപ്പിക്കുകയും ചെയ്തതായി ‘ദ സ്റ്റേറ്റ്സ്മാൻ’ റിപ്പോർട്ട് ചെയ്യുന്നു. ഫുക്കറ്റിലെ ഒരു കഫേയിൽ ഉച്ചഭക്ഷണം കഴിക്കാനെത്തിയതായിരുന്നു നാലംഗ ഇന്ത്യൻ സംഘം. ഭക്ഷണം കഴിച്ചുകൊണ്ടിരിക്കെ അപ്രതീക്ഷിതമായി ഓരോരുത്തരായി കുഴഞ്ഞുവീഴുകയായിരുന്നു. ഉടൻതന്നെ സ്ഥലത്തെത്തിയ മെഡിക്കൽ സംഘം ഇവരെ അടുത്തുള്ള ആശുപത്രിയിൽ എത്തിച്ചെങ്കിലും ഒരാളുടെ ജീവൻ രക്ഷിക്കാനായില്ല. ചികിത്സയിലുള്ള മറ്റു മൂന്നുപേരുടെയും ആരോഗ്യനിലയെക്കുറിച്ചുള്ള കൂടുതൽ വിവരങ്ങൾ അധികൃതർ പുറത്തുവിട്ടിട്ടില്ല.
മരണകാരണം സംബന്ധിച്ച് നിലവിൽ ഔദ്യോഗിക സ്ഥിരീകരണങ്ങളൊന്നുമില്ല. കഫേയിൽ വിളമ്പിയ ഭക്ഷണത്തിൽ നിന്നുള്ള വിഷബാധയാണോ അതോ മറ്റെന്തെങ്കിലും ബാഹ്യഘടകങ്ങളാണോ അപകടത്തിന് പിന്നിലെന്ന് തായ്ലൻഡ് പൊലീസ് അന്വേഷിച്ചുവരികയാണ്. കഫേയിലെ സിസിടിവി ദൃശ്യങ്ങൾ പോലീസ് പരിശോധിക്കുന്നുണ്ട്. കൂടാതെ, മരിച്ച വ്യക്തിയുടെ പോസ്റ്റ്മോർട്ടം റിപ്പോർട്ട് പുറത്തുവന്നാൽ മാത്രമേ മരണകാരണം വ്യക്തമാകൂ എന്ന് പ്രാദേശിക മാധ്യമങ്ങൾ റിപ്പോർട്ട് ചെയ്തു. സംഭവത്തെത്തുടർന്ന് തായ്ലൻഡിലെ ഇന്ത്യൻ എംബസി വിഷയത്തിൽ ഇടപെട്ടിട്ടുണ്ട്.
ബാധിക്കപ്പെട്ടവരുടെ കുടുംബാംഗങ്ങളെ വിവരം അറിയിക്കാനും ആവശ്യമായ സഹായങ്ങൾ നൽകാനുമുള്ള നടപടികൾ ആരംഭിച്ചു. തായ് അധികൃതരുമായി നിരന്തരം ബന്ധപ്പെട്ടുവരികയാണെന്നും അന്വേഷണത്തിൽ പുരോഗതി നിരീക്ഷിക്കുന്നുണ്ടെന്നും എംബസി വൃത്തങ്ങൾ അറിയിച്ചു.
