തിരുവനന്തപുരം : നിയമസഭാ തെരഞ്ഞെടുപ്പിലെ കനത്ത തോൽവിക്ക് പിന്നാലെ എൻസിപി സംസ്ഥാന ഘടകത്തിൽ ആഭ്യന്തര കലഹം പൊട്ടിത്തെറിയിലേക്ക്. മത്സരിച്ച മൂന്ന് സീറ്റുകളിലും പരാജയപ്പെട്ടതോടെ നിയമസഭയിൽ പ്രാതിനിധ്യമില്ലാതായ പാർട്ടിയിൽ ഇപ്പോൾ രണ്ട് പക്ഷങ്ങൾ ചേരിതിരിഞ്ഞ് യോഗം വിളിച്ചിരിക്കുകയാണ്. ദേശീയ വർക്കിംഗ് പ്രസിഡന്റ് പി.സി. ചാക്കോയുടെ നേതൃത്വത്തിൽ കൊച്ചിയിൽ ഗ്രൂപ്പ് യോഗം തുടരുകയാണ്. നിലവിലെ സംസ്ഥാന അധ്യക്ഷൻ തോമസ് കെ. തോമസിനെ സ്ഥാനത്തുനിന്ന് നീക്കുകയാണ് ഈ യോഗത്തിന്റെ പ്രധാന ലക്ഷ്യമെന്നാണ് സൂചന.
തോമസിന് പകരം പി.സി. ചാക്കോയോ പി.എം. സുരേഷ് ബാബുവോ അധ്യക്ഷസ്ഥാനത്തേക്ക് എത്തിയേക്കും. കൂടാതെ, എൻസിപിയെ ഇടതുമുന്നണിയിൽ നിന്ന് യുഡിഎഫിലേക്ക് എത്തിക്കാനും ചാക്കോയ്ക്ക് പദ്ധതിയുണ്ടെന്ന് റിപ്പോർട്ടുകൾ സൂചന നൽകുന്നുണ്ട്. മറുഭാഗത്ത് എ.കെ. ശശീന്ദ്രന്റെ നേതൃത്വത്തിലുള്ള വിഭാഗം നാളെ കോഴിക്കോട്ട് യോഗം ചേരുന്നുണ്ട്. എൻസിപിയിൽ നിന്ന് അടർന്നു മാറി പുതിയ പാർട്ടി രൂപീകരിക്കാനാണ് ശശീന്ദ്രൻ പക്ഷത്തിന്റെ നീക്കം
