പത്തനംതിട്ട : തദ്ദേശ സ്വയംഭരണ സ്ഥാപന തെരഞ്ഞെടുപ്പിലേക്കുള്ള തിരഞ്ഞെടുപ്പില് സി.പി.എം നേതാക്കളുടെ ഇംഗിതമനുസരിച്ച് സര്ക്കാരിന്റേയും ഉദ്യോഗസ്ഥരുടെയും ഒത്താശയോടെ വ്യാപകമായ ക്രമക്കേടാണ് നടത്തിയിട്ടുള്ളതെന്ന് കെ.പി.സി.സി രാഷ്ട്രീയകാര്യസമിതി അംഗം അഡ്വ. ഷാനിമോള് ഉസ്മാന് പറഞ്ഞു. ജില്ലാ കോണ്ഗ്രസ് കമ്മിറ്റിയുടെ നേതൃത്വത്തില് തദ്ദേശ സ്വയംഭരണ സ്ഥാപന തെരഞ്ഞെടുപ്പ് മുന്നൊരുക്കങ്ങള് വിലയിരുത്തുവാന് നടത്തിയ ബ്ലോക്ക് കോണ്ഗ്രസ് പ്രസിഡന്റുമാര്, തെരഞ്ഞെടുപ്പ് കോഡിനേറ്റര്മാര് എന്നിവരുടെ യോഗ ഉദ്ഘാടനം ചെയ്ത് സംസാരിക്കുകയായിരുന്നു അവര്.
വോട്ടര്പട്ടിക പ്രസിദ്ധീകരിക്കുന്നതിന് മുമ്പുതന്നെ സി.പി.എം നേതാക്കള്ക്ക് പട്ടിക ചോര്ത്തി നല്കുകയും നിശ്ചയിച്ച തീയതിയില് പട്ടിക പ്രസിദ്ധീകരിക്കാതിരിക്കുകയും സ്വാഭാവിക അതിര്ത്തികള് മാറ്റി മറിച്ച് ഗ്രാമപഞ്ചായത്ത് മുതല് ജില്ലാ പഞ്ചായത്ത് വരെയും മുന്സിപ്പാലിറ്റികളിലും വാര്ഡ് വിഭജനം ക്രമരഹിതമായാണ് നടത്തിയതെന്നും ഇതിനെതിരെ നിയമപരവും അല്ലാത്തതുമായ നടപടികള് സ്വീകരിക്കുമെന്നും ഷാനിമോള് ഉസ്മാന് പറഞ്ഞു. ഡി.സി.സി പ്രസിഡന്റ് പ്രൊഫ. സതീഷ് കൊച്ചുപറമ്പില് അദ്ധ്യക്ഷത വഹിച്ചു. ജനറല് സെക്രട്ടറിമാരായ അഡ്വ. എം.എം. നസീര്, അഡ്വ. പഴകുളം മധു, നേതാക്കളായ റിങ്കു ചെറിയാന്, അനീഷ് വരിക്കണ്ണാമല, എ. സുരേഷ് കുമാര്, വെട്ടൂര് ജ്യോതിപ്രസാദ്, റോബിന് പീറ്റര്, അനില് തോമസ്, സാമുവല് കിഴക്കുപുറം, റെജി തോമസ്, സജി കോട്ടക്കാട്, കെ. ജാസിംകുട്ടി, ലാലു ജോണ്, വാര് റൂം ജില്ലാ കോ-ഓര്ഡിനേറ്റര് അബ്ദുള് ഹാരിസ് എന്നിവര് പ്രസംഗിച്ചു.
