ചെന്നൈ : ഇന്ത്യയുടെ ബഹിരാകാശ ദൗത്യങ്ങൾക്ക് കൂടുതൽ കരുത്തേകുന്ന നിർണായക മുന്നേറ്റമായി ഐഎസ്ആർഒയുടെ സെമി ക്രയോജെനിക് റോക്കറ്റ് എഞ്ചിൻ പവർ ഹെഡിന്റെ പരീക്ഷണം വിജയകരമായി പൂർത്തിയായി. ലക്ഷ്യമിട്ട ശേഷിയുടെ 88 ശതമാനം കരുത്തിൽ പരീക്ഷണം വിജയിച്ചതായി ഐഎസ്ആർഒ അറിയിച്ചു. ഭാവിയിലെ കൂടുതൽ ഭാരമേറിയ ഉപഗ്രഹ വിക്ഷേപണങ്ങൾക്ക് വഴിയൊരുക്കുന്ന സുപ്രധാന നേട്ടമായാണ് ഇതിനെ വിലയിരുത്തുന്നത്. തമിഴ്നാട്ടിലെ ഐഎസ്ആർഒ പ്രൊപ്പൽഷൻ കോംപ്ലക്സിൽ ജൂൺ 24-നാണ് പരീക്ഷണം നടത്തിയത്. പരീക്ഷണത്തിനിടെ 175 ടൺ ത്രസ്റ്റ് നിലയിൽ എഞ്ചിൻ പവർ ഹെഡ് സുരക്ഷിതമായും സ്ഥിരതയോടെയും പ്രവർത്തിച്ചതായി ഐഎസ്ആർഒയുടെ ഔദ്യോഗിക പ്രസ്താവനയിൽ പറയുന്നു.
ഇതിന് മുമ്പ് 47 ശതമാനവും 60 ശതമാനവും കരുത്തിൽ നടത്തിയ പരീക്ഷണങ്ങളും വിജയകരമായിരുന്നു. അതിന്റെ തുടർച്ചയായാണ് 88 ശതമാനം ശേഷിയിൽ നടത്തിയ ഈ പരീക്ഷണം. ഇതോടെ 200 ടൺ പൂർണശേഷിയിലുള്ള പരീക്ഷണത്തിലേക്കുള്ള ആത്മവിശ്വാസം വർധിച്ചിരിക്കുകയാണ്.
