പെരുനാട്: ജനവാസ മേഖലകളില് ഇറങ്ങി കാട്ടാന കൃഷി നശിപ്പിക്കുന്നത് പതിവാകുന്നു. ഇന്നലെ രാത്രി പെരുനാട് പുതുക്കടയിലാണ് കാട്ടാന ഇറങ്ങിയത്. മേഖലയില് ഇറങ്ങിയ ആന ചിറ്റാര് റൂട്ടിലുള്ള മുറിത്താന്നിക്കല് ദേവീ ക്ഷേത്രത്തിന് സമീപത്തെ കുട്ടിവനത്തില് നിലയുറപ്പിച്ചിരിക്കുകയാണ്. ളാഹ തോട്ടത്തിന് മധ്യത്തിലാണ് ഈ വനം. അടിക്കാടുകള് തെളിച്ച് സംരക്ഷിച്ചിരുന്ന വനം ഇപ്പോള് കാടു വളര്ന്നു നില്ക്കുന്നതിനാല് കാട്ടുമൃഗങ്ങളുടെ വിഹാര കേന്ദ്രമായി മാറിയിരിക്കുകയാണ്.
തോട്ടം മേഖലയായ പുതുക്കടയില് കാട്ടാന ഇറങ്ങുന്നത് പതിവില്ലായിരുന്നു. രാത്രിയില് ഇറങ്ങിയ ആന ലയങ്ങളുടെ മുമ്പിലെ കൃഷികള് വ്യാപകമായി നശിപ്പിച്ചു. വാഴകള് മുഴുവന് മൂടോടെ പിഴുതു ചവിട്ടിമെതിച്ചാണ് ആന തിരികെ കാടു കയറിയത്. ആനകൂടി ഇറങ്ങിയതോടെ തോട്ടം മേഖലകളില് ജനങ്ങള് കടുത്ത ആശങ്കയിലായി. രാവിലെ ടാപ്പിംങ്ങിന് ഇറങ്ങാന് തൊഴിലാളികള് മടിക്കുകയാണ്. വനം വകുപ്പ് അധികൃതര് സ്ഥലം സന്ദര്ശിച്ചെങ്കിലും ജനങ്ങളുടെ ആശങ്ക ഒഴിവായിട്ടില്ല.
