ന്യൂഡല്ഹി: സെപ്റ്റംബര് 23ന് രാഹുല് ഗാന്ധി ഡല്ഹിയിലേക്ക് പോകുന്നതായി അറിയില്ലെന്ന് കോണ്ഗ്രസ് വക്താവ് ജയറാം രമേശ്. പോകുന്നുണ്ടെങ്കില് അമ്മയെ കാണാനാകുമെന്നും നാമനിര്ദേശ പത്രിക സമര്പ്പിക്കാനല്ലെന്നും അദ്ദേഹം പറഞ്ഞു. ഇതുവരെ അത്തരം തീരുമാനങ്ങള് ഉണ്ടായിട്ടില്ല. രാഹുല് ഗാന്ധി സ്ഥാനാര്ഥിയല്ല. അദ്ദേഹം കാമരാജ് മാതൃകയെയും ഒരു സമവായ സ്ഥാര്ഥിയെയുമാണ് അനുകൂലിക്കുന്നത്. എന്നാല് സമവായമില്ലെങ്കില് സ്വതന്ത്രവും നീതിയുക്തവുമായ ഒരു തെരഞ്ഞെടുപ്പാണ് പോംവഴിയെന്നും ജയറാം രമേശ് കൂട്ടിചേര്ത്തു.
കോണ്ഗ്രസ് അധ്യക്ഷ സ്ഥാനത്തേക്കുള്ള തെരഞ്ഞെടുപ്പില് താന് സ്ഥാനാര്ഥിയല്ലെന്നും ആരൊക്കെ മത്സരിക്കുന്നുണ്ടെന്ന് അറിയില്ലെന്നും ജയറാം രമേശ് വ്യക്തമാക്കി. രാജസ്ഥാന് മുഖ്യമന്ത്രി അശോക് ഗെഹ്ലോട്ട് സ്ഥാനാര്ഥിയാകും എന്ന അഭ്യൂഹങ്ങളുടെ പശ്ചാത്തലത്തില് രാജസ്ഥാനില് എന്താണ് സംഭവിക്കുന്നതെന്ന് തനിക്ക് അറിയില്ലെന്നും അദ്ദേഹം പറഞ്ഞു.
അശോക് ഗെലോട്ട് ചൊവ്വാഴ്ച പാര്ട്ടി എം.എല്.എമാരുമായി കൂടിക്കാഴ്ച നടത്തി. താന് നാമനിര്ദേശ പത്രിക സമര്പ്പിച്ചാല് എം.എല്.എമാരെ ന്യൂഡല്ഹിയിലേക്ക് വിളിപ്പിക്കുമെന്നും അറിയിച്ചിരുന്നു. ‘ഭാരത് ജോഡോ’ യാത്രയില് പങ്കെടുക്കുന്നതിനായി കേരളത്തിലേക്കെത്തുന്നതിന് മുമ്പ് ഗെഹ്ലോട്ട് സോണിയ ഗാന്ധിയെ കാണുമെന്നും അറിയിച്ചു. തെരഞ്ഞെടുപ്പില് മത്സരിക്കാന് രാഹുല് ഗാന്ധിയെ വീണ്ടും പ്രേരിപ്പിക്കുമെന്ന് ഗെഹ്ലോട്ട് എം.എല്.എമാരോട് പറഞ്ഞതായും റിപ്പോര്ട്ടുകളുണ്ട്.
