ന്യൂഡല്ഹി : ലൈംഗികാതിക്രമങ്ങള്ക്കെതിരായ ബോധവത്കരണവുമായി ബന്ധപ്പെട്ട് ഡല്ഹി ജവഹര്ലാല് നെഹ്റു സര്വകലാശാല പുറത്തിറക്കിയ സര്ക്കുലര് സ്ത്രീവിരുദ്ധമാണെന്നും പിന്വലിക്കണമെന്നും ദേശീയ വനിത കമ്മീഷന്. തങ്ങളുടെ ആണ്സുഹൃത്തുക്കളുമായുള്ള സൗഹൃദത്തിന് എവിടെയാണ് അതിര്വരമ്പ് വേണ്ടതെന്ന് പെണ്കുട്ടികള് മനസ്സിലാക്കണം എന്ന് ആവശ്യപ്പെടുന്ന സര്ക്കുലര് സ്ത്രീവിരുദ്ധമാണെന്ന് വനിത കമ്മീഷന് അധ്യക്ഷ രേഖ ശര്മ ആരോപിച്ചു.
എല്ലായ്പ്പോഴും ഉപദേശം സ്ത്രീകളോടു മാത്രമായി ഒതുങ്ങുന്നത് എന്തുകൊണ്ടാണെന്ന് ചോദിച്ച രേഖ ശര്മ ഇരയെ അല്ല അതിക്രമം കാണിക്കുന്നവരെ വേണം ബോധവത്കരിക്കാനെന്ന് ചൂണ്ടിക്കാട്ടി. സര്ക്കുലര് പുറത്തിറക്കിയ ആഭ്യന്തരസമിതി ഇരയോട് അനുഭാവപൂര്ണ നിലപാട് സ്വീകരിക്കണമെന്നും അവര് ആവശ്യപ്പെട്ടു.
ലൈംഗികാതിക്രമങ്ങളുമായി ബന്ധപ്പെട്ട് ജനുവരി 17ന് കൗണ്സലിങ് നടത്തുമെന്ന് അറിയിച്ച് വാഴ്സിറ്റി വെബ്സൈറ്റില് പ്രസിദ്ധീകരിച്ച സര്ക്കുലറിലാണ് വിവാദ പരാമര്ശമുള്ളത്. ‘അടുത്ത സുഹൃത്തുക്കള് ലൈംഗികാതിക്രമം നടത്തുന്നതായ ഒട്ടേറെ പരാതികള് സമിതിക്ക് ലഭിക്കാറുണ്ട്. ആണ്കുട്ടികള് പലപ്പോഴും സൗഹൃദത്തിന്റെ അതിര്വരമ്പ് ലംഘിക്കാറുള്ളതായി കാണുന്നു. അതുകൊണ്ട് ഇത്തരം അതിക്രമങ്ങള്ക്ക് ഇരയാകാതിരിക്കാന് ആണ്സൗഹൃദങ്ങള്ക്കിടയില് വ്യക്തമായ അതിര്വരമ്പ് വരക്കേണ്ടത് എവിടെയാണെന്ന് പെണ്കുട്ടികള് മനസ്സിലാക്കേണ്ടതുണ്ട്’ -സര്ക്കുലര് വിവരിക്കുന്നു.
