ചെങ്ങന്നൂര്‍ : പെട്രോളിയം കമ്പനിയില്‍ ജോലി വാഗ്ദാനം നല്‍കി കേരളത്തിന്‍റെ വിവിധ ഭാഗങ്ങളില്‍നിന്നുള്ള ഉദ്യോഗാര്‍ഥികളില്‍ നിന്ന് പണം തട്ടിയ കേസില്‍ ഒളിവില്‍ കഴിഞ്ഞ പ്രതി അറസ്റ്റില്‍. ഖത്തറിലെ സീ ഡ്രില്‍ കമ്പനിയില്‍ ജോലി വാഗ്ദാനം ചെയ്ത് എഴുപതോളം പേരില്‍ നിന്ന് 50 ലക്ഷത്തിലധികം രൂപ വാങ്ങി തട്ടിപ്പ് നടത്തിയ മാന്നാര്‍ കുരട്ടിശ്ശേരി പാവുക്കര അരികുപുറത്ത് വീട്ടില്‍ ബോബി തോമസിനെയാണ് (49) മാന്നാര്‍ പോലീസ് അറസ്റ്റ് ചെയ്തത്.
ഒന്നര മാസമായി ബോബി തോമസ് ഒളിവിലായിരുന്നു. തട്ടിപ്പിനിരയായ യുവാക്കള്‍ മാന്നാര്‍ പോലീസില്‍ നവംബര്‍ 16ന് നല്‍കിയ പരാതിയുടെ അടിസ്ഥാനത്തില്‍, മൊഴി രേഖപ്പെടുത്തിയാണ് കേസെടുത്തത്. ബോബി തോമസിന്‍റെ പുതിയ നമ്പര്‍ പോലീസിന് ലഭിച്ചതോടെ നടത്തിയ അന്വേഷണത്തിലാണ് ഹരിപ്പാട് കാര്‍ത്തികപ്പള്ളിയിലെ ബന്ധുവീട്ടില്‍ നിന്ന് പ്രതിയെ അറസ്റ്റ് ചെയ്തത്. കോഴിക്കോട്, എറണാകുളം, തൃശൂര്‍, പാലക്കാട്, പത്തനംതിട്ട ജില്ലകളില്‍ നിന്നുള്ള മുപ്പത്തിയേഴോളം പേരാണ് പരാതി മാന്നാര്‍ പോലീസ് സ്റ്റേഷനില്‍ നല്‍കിയത്. ഒരാളില്‍നിന്ന് ഒന്നേകാല്‍ ലക്ഷം രൂപ വീതമാണ് വാങ്ങിയത്.
മൂന്നുവര്‍ഷമായി പരാതിക്കാര്‍ ബോബി തോമസില്‍നിന്ന് തുക മടക്കിക്കിട്ടാനായി ശ്രമിക്കുന്നുവെന്നും പലതവണ അവധി പറഞ്ഞ് പറ്റിച്ചതായും പരാതിയില്‍ പറയുന്നു.മാന്നാര്‍ പൊലീസ് ഇന്‍സ്‌പെക്ടര്‍ എസ്.എച്ച്‌. ഒ ജി. സുരേഷ് കുമാറിന്‍റെ നേതൃത്വത്തില്‍ എസ്. ഐ അനില്‍കുമാര്‍, സിവില്‍ പോലീസ് ഓഫീസര്‍മാരായ സിദ്ദീഖ് ഉല്‍ അക്ബര്‍, അരുണ്‍, സജീവ്, ദിനേശ് ബാബു എന്നിവരടങ്ങുന്ന പോലീസ് സംഘമാണ് പ്രതിയെ അറസ്റ്റ് ചെയ്തത്.
കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. ഇതുകൂടാതെ, ഇതേ രീതിയില്‍ മറ്റൊരു കേസ് കൂടി ബോബി തോമസിന്‍റെ പേരില്‍ രജിസ്റ്റര്‍ ചെയ്തതായും പിന്നീട് കസ്റ്റഡിയില്‍ വാങ്ങിയ ശേഷം അതിന്മേലുള്ള നടപടികള്‍ സ്വീകരിക്കുമെന്നും മാന്നാര്‍ പോലീസ് ഇന്‍സ്‌പെക്ടര്‍ ജി. സുരേഷ് കുമാര്‍ പറഞ്ഞു.
