പത്തനംതിട്ട: പങ്കാളിത്ത പെൻഷൻ പിൻവലിക്കുക എന്ന മുദ്രാവാക്യമുയർത്തി ജോയിന്റ് കൗൺസിൽ നേതൃത്വത്തില് നടത്തിയ വാഹന പ്രചരണ ജാഥ ആവേശോജ്വല സ്വീകരണങ്ങള് ഏറ്റു വാങ്ങിക്കൊണ്ടു സമാപിച്ചു. ഒക്ടോബർ 26ന് കാൽലക്ഷം ജീവനക്കാരെ അണി നിരത്തി സെക്രട്ടറി യേറ്റ് മാർച്ച് സംഘടിപ്പിച്ചിരിക്കുന്നതിന്റെ ഭാഗമായാണ് ജാഥ നടത്തിയത്. സുസ്ഥിരവും കാര്യക്ഷമവുമായ സിവിൽ സർവ്വീസ് എന്ന ശ്രമങ്ങൾക്ക് കടയ്ക്കൽ കത്തിവെയ്ക്കുന്ന പുത്തൻ സാമ്പത്തിക നയങ്ങളുടെ ഉൽപ്പന്നമായ പങ്കാളിത്ത പെൻഷൻ സർവ്വനാശം വിതയ്ക്കുന്നതും സർക്കാരിന്റെയും ജീവനക്കാരുടെയും വിഹിതം കവർന്നെടുത്ത് കോർപ്പറേറ്റുകളുടെ ചൂതാട്ടത്തിനായി ഓഹരി കമ്പോളത്തിലേയ്ക്ക് എത്തിക്കുന്ന ഗൂഢ പദ്ധതിയാണിതെന്നും നേതൃത്വം ചൂണ്ടിക്കാട്ടി.
2016-ലെ തെരഞ്ഞെടുപ്പ് പ്രകടന പത്രികാ വാഗ്ദാനമായിരുന്ന പങ്കാളിത്ത പെൻഷൻ പുനപരിശോധന പൂർത്തിയാക്കുവാനോ, പിൻവലിക്കുവാൻ നടപടി സ്വീക രിക്കുവാനോ ഇതേവരെ കഴിയാത്ത സാഹചര്യത്തിലാണ് ജോയിന്റ് കൗൺസിൽ തുടർ പ്രക്ഷോഭങ്ങളുടെ അടുത്ത ഘട്ടത്തിലേക്ക് കടന്നത്. സെക്രട്ടറിയേറ്റ് മാർച്ചിന്റെ പ്രചരണാർത്ഥം ഒക്ടോബർ 18, 19 തീയതികളിലായി വാഹനപ്രചരണ ജാഥ പത്തനംതിട്ട ജില്ലയിലെ വിവിധ മേഖലകളിൽ പര്യടനം നടത്തി. ഒക്ടോബർ 18-ന് റാന്നിയിൽ നിന്നും ആരംഭിച്ച ജാഥ ജോയിന്റ് കൗൺസിലിന്റെ മുൻകാല നേതാവും സി.പി.ഐ. നേതാവുമായ മലയാലപ്പുഴ ശശി ഉദ്ഘാടനം ചെയ്ത് പതാക ജാഥാ ക്യാപ്റ്റൻ എന്. ക്യഷ്ണകുമാറിന് കൈമാറി.
തുടർന്ന് കോന്നി, പത്തനംതിട്ട, കോഴഞ്ചേരി,മല്ലപ്പള്ളി, തിരുവല്ല, പന്തളം, പറക്കോട് എന്നീ ജാഥ സ്വീകരണ കേന്ദ്രങ്ങളിൽ സംഘടന വ്യത്യാസമില്ലാതെ എല്ലാജീവനക്കാരും ആവേശജനകമായ സ്വീകരണമാണ് ജാഥയ്ക്ക് നൽകിയത്.ഇന്നു വൈകിട്ട് 5ന് അടൂർ റവന്യൂ ടവറിൽ സമാപിച്ച ജാഥയെ അഭിസംബോധന ചെയ്ത് ജാഥാ ക്യാപ്റ്റനും സംസ്ഥാന സെക്രട്ടറിയറ്റ് അംഗവുമായ എന് കൃഷ്ണകുമാർ ജാഥയുടെ ഉദ്ദേശലക്ഷ്വങ്ങളെ പറ്റി വിശദീകരിച്ചു.
ജാഥാ വൈസ് ക്യാപ്റ്റൻ കെ പ്രദീപ് കുമാർ, മാനേജർ ജി അഖിൽ , ജില്ലാ പ്രസിഡന്റ് ആര് മാനാജ് കുമാർ സംസ്ഥാന കമ്മറ്റി അംഗമായ എന് സോയാമോൾ , സംസ്ഥാന കൗൺസിൽ അംഗങ്ങളായ മാത്യു വർഗ്ഗീസ്, വി പ്രസാദ്, സരള , സജീന്ദ്രൻ നായർ എന്നിവർ പ്രസംഗിച്ചു ജില്ലാ കമ്മിറ്റി സഖാക്കളായ ഐ സബീന, എ ഷാജഹാൻ, ഡാനിയേൽ കുട്ടി, സിനി, രജനി, മനോജ് കുമാർ, സുരേഷ് , രാജീവ്, എന്നിവർ വിവിധയിടങ്ങളിലെ സ്വീകരണത്തിന് നേതൃത്വം നല്കി.
