മുംബൈ: ഗുജറാത്തില് കൈക്കൂലി കേസില് അറസ്റ്റിലായ ഉദ്യോഗസ്ഥന് സിബിഐ കസ്റ്റഡിയില് ആത്മഹത്യ ചെയ്തു. അഞ്ച് ലക്ഷം രൂപ കൈക്കൂലി വാങ്ങിയതിന് അറസ്റ്റിലായ വിദേശ വ്യാപാര ജോയിന്റ് ഡയറക്ടര് ജനറല് ആയിരുന്ന ജാവരി ബിഷ്ണോയ് എന്നയാളാണ് ജീവനൊടുക്കിയത്. ചോദ്യം ചെയ്യലിനിടെ ഓഫീസിന്റെ നാലാം നിലയില് നിന്ന് താഴേക്ക് ചാടുകയായിരുന്നു. ഇന്നലെയാണ് സിബിഐ ഇയാളെ അറസ്റ്റ് ചെയ്തത്. ഭക്ഷ്യ കാനുകള് കയറ്റുമതി ചെയ്യുന്നതിനുള്ള നോ ഒബ്ജക്ഷന് സര്ട്ടിഫിക്കറ്റ് (എന്.ഒ.സി) നല്കണമെങ്കില് ഒന്പത് ലക്ഷം രൂപ കൈക്കൂലി നല്കണമെന്ന് ഇയാള് ഒരു വ്യവസായിയോട് ആവശ്യപ്പെട്ടിരുന്നു.
വ്യവസായിയുടെ പരാതിയുടെ അടിസ്ഥാനത്തിലാണ് പോലീസ് അന്വേഷണം ആരംഭിച്ചത്. ആദ്യ ഗഡുവായി അഞ്ച് ലക്ഷം രൂപ ആവശ്യപ്പെടുകയും ബാക്കി തുക എന്.ഒ.സി നല്കുന്ന സമയത്ത് നല്കണമെന്നും ബിഷ്ണോയ് നിര്ദേശിച്ചതായി പരാതിയില് പറയുന്നുണ്ട്. പരാതിക്കാരനില് നിന്ന് കൈക്കൂലി വാങ്ങുന്നതിനിടെയാണ് സി.ബി.ഐ കെണിയൊരുക്കി പ്രതിയെ കുടുക്കിയത്.
