റാന്നി: അപ്രതീക്ഷിത വെള്ളപ്പൊക്കത്തില് വലഞ്ഞ് ജനങ്ങള്. ഒരു ദിവസം നീണ്ടു നിന്ന കനത്ത മഴയില് പമ്പാ നദിയില് വെള്ളം ഉയര്ന്നതോടെ റാന്നി ടൗണില് വെള്ളം കയറി. പ്രളയം അപ്രതീക്ഷിതമായതിനാല് വ്യാപാരികള്ക്ക് സ്ഥാപനങ്ങളില് നിന്നും സാധനങ്ങള് മാറ്റുവാന് കഴിഞ്ഞില്ല. അതുകൊണ്ടുതന്നെ കനത്ത നഷ്ടമാണ് വ്യാപാരികള്ക്ക് ഉണ്ടായിരിക്കുന്നത്. താഴ്ന്ന പ്രദേശങ്ങളിലെ വീടുകളിലും വെള്ളം കയറി. പുനലൂര് – മൂവാറ്റുപുഴ സംസ്ഥാന പാതയില് വെള്ളം കയറിയതോടെ ഗതാഗതവും മുടങ്ങി.
മാമുക്കിലും ഇട്ടിയപ്പാറയിലും ചെത്തോങ്കരയിലും വെള്ളം കയറിയതോടെ ദീര്ഘദൂര യാത്രക്കാര്ക്ക് ദുരിതമായി. അത്തിക്കയം, വടശേരിക്കര തുടങ്ങിയ സ്ഥലങ്ങളിലും വെള്ളപ്പൊക്കും ഗതാഗതം മുടക്കി. ഇടമുറി – അത്തിക്കയം റോഡില് പൊന്നമ്പാറയില് മരം വൈദ്യുതി ലൈനിനു മുകളില് വീണ് നിരവധി വൈദ്യുതി തൂണുകള് തകര്ന്നു. മഴ കുറഞ്ഞതോടെ വെള്ളം ഇറങ്ങുമെന്ന പ്രതീക്ഷയിലാണ് ജനങ്ങള്. റാന്നിയില് എന്.ഡി.ആര്.എഫ് സംഘത്തിന്റെ സേവനം ലഭ്യമായിട്ടുണ്ട്.
