തിരുവനന്തപുരം : ജോസ് കെ മാണി വിഷയത്തില്‍ നിലപാട് മാറ്റി സിപിഐ. കേരളാ കോണ്‍ഗ്രസ് ജോസ് കെ മാണി വിഭാഗത്തിന്റെ എല്‍ഡിഎഫിലേക്കുള്ള രംഗപ്രവേശത്തിന് പാര്‍ട്ടി വിട്ടുവീഴ്ചക്ക് തയാറെന്നാണ് സൂചന. ഇതുസംബന്ധിച്ച്‌ സിപിഐ സംസ്ഥാന നേതൃയോഗങ്ങള്‍ ഈ മാസം ചേരും.
കഴിഞ്ഞ ദിവസം എകെജി സെന്ററില്‍ സിപിഐഎം- സിപിഐ നിര്‍ണായക കൂടിക്കാഴ്ച നടന്നിരുന്നു. സിപിഐ സംസ്ഥാന സെക്രട്ടറി കാനം രാജന്ദ്രേന്‍ എകെജി സെന്ററില്‍ എത്തി പിണറായി വിജയനെയും കോടിയേരി ബാലകൃഷ്ണനെയും കണ്ടു. ജോസ് കെ മാണിയുടെ മുന്നണി പ്രവേശം അടക്കം ചര്‍ച്ച ചെയ്തതായാണ് സൂചന. സമകാലിക രാഷ്ട്രീയ വിവാദങ്ങളും ചര്‍ച്ച ചെയ്തു. വൈകിട്ടായിരുന്നു കൂടിക്കാഴ്ച. ചവറ, കുട്ടനാട് ഉപതെരഞ്ഞെടുപ്പുകളും തദ്ദേശ തെരഞ്ഞെടുപ്പും ചര്‍ച്ചയായതായി സൂചനയുണ്ട്. ജോസ് കെ മാണിയുടെ മുന്നണി പ്രവേശനവുമായി ബന്ധപ്പെട്ടുള്ള പല ചര്‍ച്ചകള്‍ നടക്കുന്നുണ്ടെങ്കിലും സിപിഐ ഇക്കാര്യത്തില്‍ എതിര്‍പ്പ് അറിയിച്ചിരുന്നു.
