കോട്ടയം: യുവത്വത്തെ നശിപ്പിക്കുന്ന മയക്കുമരുന്ന് വിപത്തിനെ പാടേ ഇല്ലാതാക്കുവാന് സമൂഹിക ഇടപെടലുകള് ഉണ്ടാവണമെന്നും ലഹരിയുടെ സാമൂഹിക വിപത്തു സംബന്ധിച്ച് വിദ്യാര്ത്ഥികളില് അവബോധം സൃഷ്ടിക്കുന്നതിനായി സ്കൂള് പാഠ്യപദ്ധതിയില് ഉള്പ്പെടുത്തുകയും ചെയ്യണമെന്ന് ജോസ്.കെ.മാണി എം.പി.പറഞ്ഞു.
മയക്കുമരുന്നു വിതരണ ശൃംഖല തകര്ക്കുവാന് അധികൃതരോടൊപ്പം ഏവരും സഹകരിക്കണമെന്ന് അദ്ദേഹം അഭ്യര്ത്ഥിച്ചു. വര്ദ്ധിച്ചുവരുന്ന മയക്കുമരുന്ന് ഉപയോഗത്തിനെതിരെ സമൂഹ മന:സാക്ഷിയെ ഉണര്ത്തുക എന്ന ലക്ഷ്യത്തോടെ കേരളാ കോണ്ഗ്രസ് (എം) ന്റെ നേതൃത്വത്തില് കോട്ടയം ജില്ലയിലാകെ നടത്തിയ ബോധവല്ക്കരണ പരിപാടിക്ക് തുടക്കം കുറിച്ചു കൊണ്ട് സംസ്ഥാനതല മോചന ജ്വാല തെളിക്കല് പരിപാടി പാലായില് ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം.
ശിശുദിനമായ ഇന്നലെ ‘മയക്കുമരുന്നിനെതിരെ മോചനജ്വാലയുമായി ജില്ലയിലെ മുഴുവന് വാര്ഡ് കമ്മറ്റികളുടെയും മണ്ഡലം കമ്മിറ്റികളുടേയും നേതൃത്വത്തില് ഓരോ പഞ്ചായത്തിലെയും തെരഞ്ഞെടുത്ത 7 ല് പരം കേന്ദ്രങ്ങളില് പ്രവര്ത്തകര് ജ്വാല തെളിച്ച് മയക്കുമരുന്നു വിരുദ്ധ പ്രതിജ്ഞ എടുത്തു. ഓരോ കേന്ദ്രത്തിലെയും വ്യാപാരസ്ഥാപനങ്ങളും പൊതുസ്ഥലങ്ങളും സന്ദര്ശിച്ച് മയക്കുമരുന്ന് വിരുദ്ധ പ്രചരണ ലഘുലേഖകളും വിതരണം നടത്തുകയും ചെയ്തു. വിവിധ കേന്ദ്രങ്ങളില് നിന്ന് മണ്ഡലത്തിലെ പ്രധാന ജംഗ്ഷനിലേക്ക് ജാഥയും പ്രചാരണ പരിപാടികളോടൊപ്പം സംഘടിപ്പിച്ചു.
