കോട്ടയം : കേരള കോണ്ഗ്രസ് ജോസഫ് വിഭാഗത്തിലെ സംഘടനാ പദവികളെ ചൊല്ലിയുള്ള തര്ക്കത്തില് പൊട്ടിത്തെറിച്ച് മോന്സ് ജോസഫ്. മറ്റാര്ക്കെങ്കിലും എക്സിക്യൂട്ടീവ് ചെയര്മാന് പദവി വേണമെങ്കില് വിട്ടു നല്കാന് തയ്യാറാണെന്ന് വൈകാരിക മറുപടി. സംഘടനാ തെരഞ്ഞെടുപ്പ് വേണമെന്ന് ആവര്ത്തിച്ച ഫ്രാന്സിസ് ജോര്ജ്, പുനഃസംഘടന വരെ മോന്സ് ജോസഫ് തുടരുന്നതില് എതിര്പ്പില്ലെന്നും പ്രതികരിച്ചു.
അക്ഷീണം പ്രയത്നിച്ചതിനാലാണ് ഉത്തരവാദിത്വങ്ങള് പി.ജെ ജോസഫ് തന്നെ ഏല്പ്പിച്ചത്. പല ഘട്ടത്തിലും പാര്ട്ടിക്കായി ചെയ്ത ത്യാഗങ്ങളും മോന്സ് ജോസഫ് ഓര്മ്മപ്പെടുത്തി. എന്നാല് സംഘടനാ തെരഞ്ഞെടുപ്പ് വരെ മോന്സ് തുടരുന്നതില് എതിര്പ്പില്ലെന്ന് ഫ്രാന്സിസ് ജോര്ജ് പ്രതികരിച്ചു.
അതേസമയം മോന്സ് ജോസഫ്, ജോയി എബ്രഹാം തുടങ്ങിയവര് പാര്ട്ടിയെ ഹൈജാക്ക് ചെയ്തു എന്നായിരുന്നു ഫ്രാന്സിസ് ജോര്ജ് വിഭാഗത്തിന്റെ പരാതി. നേതാക്കളുടെ പ്രതിഷേധം പാര്ട്ടി പരിപാടികള് ബഹിഷ്കരിക്കുന്നതിലേക്ക് വരെ എത്തിയതോടെയാണ് മോന്സ് ജോസഫിന്റെ മറുപടി. സംഘടനാ തെരഞ്ഞെടുപ്പ് നടത്തി പ്രശ്നം പരിഹരിക്കാനാണ് പി ജെ ജോസഫിന്റെ നീക്കം.