പത്തനംതിട്ട: പോലീസിന് ചേരാത്ത പ്രവർത്തി വെച്ചുപൊറുപ്പിക്കില്ലെന്ന പോലീസ് അസോസിയേഷൻ സംസ്ഥാന സമ്മേളനത്തിലെ മുഖ്യമന്ത്രിയുടെ പ്രഖ്യാപനം ഈ കാലഘട്ടത്തിലെ ഏറ്റവും വലിയ തമാശയാണെന്ന് കേരള കോൺഗ്രസ് വൈസ് ചെയർമാൻ ജോസഫ് എം. പുതുശ്ശേരി. പോലീസിന്റെ മാനം കെടുത്തി തുടരെത്തുടരെ കോടതിയിൽ നിന്ന് തിരിച്ചടി ഏറ്റുവാങ്ങേണ്ടി വന്ന അടുത്തകാലത്തെ സംഭവ പരമ്പരകളുടെ എല്ലാം പ്രഭവ കേന്ദ്രം മുഖ്യമന്ത്രിയുടെ ഓഫീസ് ആണെന്നിരിക്കെ അതു മറച്ചുവെച്ചുകൊണ്ട് നടത്തുന്ന പ്രസ്താവനക്ക് എന്തു വിലയാണുള്ളത്? അതാരാണ് അംഗീകരിക്കുക എന്നും അദ്ദേഹം ചോദിച്ചു.
നിയമങ്ങളും ചട്ടങ്ങളും നടപടിക്രമങ്ങളും പാലിക്കാതെയാണ് പോലീസ് പ്രവർത്തിക്കുന്നതെന്ന് പോലീസ് ചമച്ച കള്ളക്കേസുകളുമായി ബന്ധപ്പെട്ട് മജിസ്ട്രേറ്റ് കോടതി മുതൽ ഹൈക്കോടതി വരെ അടുത്ത ദിവസങ്ങളിൽ ഒന്നിനു പുറകെ ഒന്നായി വന്ന വിധി ന്യായങ്ങളിൽ വ്യക്തമാക്കിയിരുന്നു. ഇതെല്ലാം മുഖ്യമന്ത്രിയേയും സർക്കാരിനെയും വിമർശിച്ചവരെയും പ്രതിഷേധിച്ചവരെയും അകത്താക്കാൻ അമിതാവേശത്തോടെ കെട്ടിച്ചമച്ച കേസുകളിലായിരുന്നു.
പോലീസിന് നിരക്കാത്തത് വെച്ചുപൊറുപ്പിക്കില്ലെന്ന മുഖ്യമന്ത്രിയുടെ പ്രസ്താവനയിൽ തരിമ്പെങ്കിലും ആത്മാർത്ഥതയുണ്ടെങ്കിൽ ആദ്യം തിരുത്തേണ്ടത് മുഖ്യമന്ത്രിയും ഓഫീസുമാണ്. അതു ചെയ്യാതെ നടത്തുന്ന ഏത് പ്രഖ്യാപനവും വെറും വീരസ്യം മാത്രമായി അവശേഷിക്കുമെന്നും വൈദ്യരെ സ്വയം ചികിത്സിക്കൂ എന്നതാണ് അതിനുള്ള സ്വാഭാവിക പ്രതികരണമെന്നും പുതുശ്ശേരി പറഞ്ഞു.
