ന്യൂഡല്ഹി : അനുമതിയില്ലാതെ കെ. റെയിലിന് കല്ലിട്ട സംസ്ഥാന സര്ക്കാര് ജനങ്ങളോട് മാപ്പ് പറയണമെന്ന് കോണ്ഗ്രസ് നേതാവ് കെ.മുരളീധരന് എം.പി. തട്ടിക്കൂട്ടിയ ഡി.പി.ആര് ആണെന്ന് പ്രതിപക്ഷം പറഞ്ഞത് കേന്ദ്ര സര്ക്കാര് ശരിവെച്ചിരിക്കുകയാണെന്നും അദ്ദേഹം പറഞ്ഞു. അനുമതിയില്ലാതെയാണ് കല്ലിടുന്നതെന്ന് പ്രതിപക്ഷം ആദ്യം മുതല് പറഞ്ഞിരുന്നു. സര്വേ കല്ലുകള് പിഴുതെറിയുമെന്ന് പ്രതിപക്ഷം പറഞ്ഞത് യാഥാര്ഥ്യമായെന്നും കെ. മുരളീധരന് മാധ്യമങ്ങളോട് പറഞ്ഞു.
എം.പിമാരായ എന്.കെ പ്രേമചന്ദ്രന്, കെ. മുരളീധരന് എന്നിവര്ക്ക് പാര്ലമെന്റില് രേഖാമൂലം നല്കിയ മറുപടിയിലാണ് കെ. റെയില് പദ്ധതിക്ക് ഇപ്പോള് അനുമതി നല്കാനാവില്ലെന്ന് കേന്ദ്ര സര്ക്കാര് വ്യക്തമാക്കിയത്. കേരളം നല്കിയ ഡി.പി.ആര് പൂര്ണമല്ലെന്ന് കേന്ദ്ര റെയില്വേ മന്ത്രി അശ്വിനി വൈഷ്ണവ് ചൂണ്ടിക്കാട്ടി. പദ്ധതി റിപ്പോര്ട്ടില് സാങ്കേതികമായും സാമ്പത്തികമായും ഇത് പ്രായോഗികമാണോ എന്ന് കേരളം വ്യക്തമാക്കിയിട്ടില്ല. ഏറ്റെടുക്കേണ്ട റെയില്വേ, സ്വകാര്യ ഭൂമിയുടെ കണക്ക് കാണിക്കണം. പരിസ്ഥിതി പഠനം സംബന്ധിച്ച് ഒരു റിപ്പോര്ട്ടും നല്കിയിട്ടില്ല. ഇതെല്ലാം പരിശോധിച്ച ശേഷം മാത്രമേ തീരുമാനം എടുക്കാന് സാധിക്കൂവെന്നും കേന്ദ്ര സര്ക്കാര് വ്യക്തമാക്കുന്നു.
