പത്തനംതിട്ട : കേരളത്തെ കടക്കെണിയിലാക്കുന്നതും സാധാരണക്കാരന് പ്രയോജനം ചെയ്യാത്തതും, പരിസ്ഥിതി വിനാശകരവുമായ കെ റെയിൽ പദ്ധതി ഉപേക്ഷിക്കണമെന്ന് കെ റെയിൽ വിരുദ്ധ സമര ജില്ലാ ഐക്യദാർഢ്യ സമിതി ചെയർമാൻ ജോസഫ് എം. പുതുശ്ശേരി ഗവണ്മന്റിനോടാവശ്യപ്പെട്ടു.
കെ- റെയിൽ വിരുദ്ധ ഐക്യദാർഢ്യ സമിതി സംഘടിപ്പിച്ച കൺവൻഷൻ ഉദ്ഘാടനം ചെയ്യുകയായിരുന്നു അദ്ദേഹം.
പദ്ധതിക്ക് സാധ്യതാപഠനമോ, പരിസ്ഥിതി ആഘാത പഠനമോ, സാമൂഹിക ആഘാത പഠനമോ, ഡിപിആർ എന്നിവയൊന്നുമില്ലാതെ, സ്വന്തം മുന്നണിയിൽപോലും ചർച്ച ചെയ്യാതെ നടപ്പാക്കുവാൻ ശ്രമിക്കുന്നു എന്നതു തന്നെ സംശയത്തിന്റെ നിഴലിൽ നിർത്തുന്നതാണ്. ഏതു സമയവും ഉരുൾപൊട്ടലും വെള്ളപ്പൊക്കവുമുണ്ടാകുന്ന കേരളത്തിൽ പരിസ്ഥിതി വിനാശകരമായ രീതിയിലാണ് പദ്ധതിയുമായി മുന്നോട്ടു പോകുന്നത്.
ഇതിന് അനുകൂലമായി സർക്കാർ നിരത്തുന്ന വാദങ്ങൾ യുക്തിക്ക് നിരക്കാത്തതാണ്. പദ്ധതിക്കു വേണ്ടി കുടിയൊഴിപ്പിക്കുന്ന ഇരുപതിനായിരം കുടുംബങ്ങൾ മാത്രമല്ല ഈ പദ്ധതിമൂലം പാരിസ്ഥിതിക പ്രശ്നങ്ങൾ നേരിടേണ്ടി വരുന്ന മുഴുവൻ കുടുംബങ്ങളേയും ഇരകളാക്കിത്തീർക്കുന്ന പദ്ധതി കൂടിയാണ് കെ-റെയിൽ എന്ന് ജോസഫ് എം. പുതുശ്ശേരി പറഞ്ഞു.
ജനകീയ പ്രതിരോധ സമിതി ജില്ലാ വൈസ്സി പ്രസിഡന്റ് ജോർജ് മാത്യു കൊടുമൺ അദ്ധ്യക്ഷത വഹിച്ചു. കെ.ആർ. അശോക് കുമാർ, റെജി മലയാലപ്പുഴ, സാമുവേൽ പ്രക്കാനം, കെ.ജി. അനിൽകുമാർ,സി.കെ.അർജ്ജുനൻ, സത്യചന്ദ്രൻ, ബേബി ചെരിപ്പിട്ടകാവ്, പി.കെ. ഭഗത്ത്, രതീഷ് രാമകൃഷ്ണൻ , സുരേഷ്കുമാർ എന്നിവർ പ്രസംഗിച്ചു.
