ആറ്റിങ്ങല് : ആറ്റിങ്ങലില് കെ – റെയില് പദ്ധതിക്ക് കല്ലിടാനെത്തിയവര്ക്ക് നേരെ പ്രതിഷേധിച്ച് നാട്ടുകാര്. ആറ്റിങ്ങലിന് സമീപം ആലങ്കോട് തെറ്റിക്കലിലാണ് നാട്ടുകാര് പ്രതിഷേധവുമായി രംഗത്തെത്തിയത്. തിങ്കളാഴ്ച രാവിലെ പത്ത് മണിയോടെയാണ് പദ്ധതിക്ക് കല്ലിടാനെത്തിയ ഉദ്യോഗസ്ഥരെ നാട്ടുകാര് തടഞ്ഞത്. തുടര്ന്ന് പോലീസ് ഉദ്യോഗസ്ഥരെത്തി പ്രതിഷേധക്കാരെ അറസ്റ്റ് ചെയ്ത് മാറ്റി. പോലീസെത്തി സ്ഥലത്ത് നിന്ന് മാറാന് ആവശ്യപ്പെട്ടെങ്കിലും ഇരുപതോളം വരുന്ന പ്രതിഷേധക്കാര് മാറാന് തയ്യാറായിരുന്നില്ല. തുടര്ന്ന് ബലം പ്രയോഗിച്ചാണ് പോലീസ് ഇവരെ മാറ്റിയത്. നേരത്തെ തന്നെ ഈ സ്ഥലത്ത് പദ്ധതിക്കെതിരെ സമരസമിതി രൂപീകരിച്ചുള്ള പ്രതിഷേധങ്ങള് നടന്നിരുന്നു.
