ആറന്മുള : പത്തനംതിട്ട നഗരം ഉള്പ്പെടുന്ന ആറന്മുള മണ്ഡലത്തില് ദീര്ഘവീക്ഷണത്തോടെയുള്ള വികസന പദ്ധതികള് നടപ്പിലാക്കുമെന്ന് യു.ഡി.എഫ് സ്ഥാനാര്ഥി അഡ്വ. കെ.ശിവദാസന് നായര് പറഞ്ഞു. യു.ഡി.എഫ് അധികാരത്തിലെത്തിയാല് ഇതിനുവേണ്ടി മാസ്റ്റര് പ്ലാന് തയ്യാറാക്കുമെന്നും അദ്ദേഹം പറഞ്ഞു. ആറന്മുളയില് കഴിഞ്ഞ അഞ്ചുവര്ഷം നടന്നത് സോഷ്യല് മീഡിയായിലൂടെയുള്ള വികസനമാണെന്നും യഥാര്ഥ വികസനവുമായി യു.ഡി.എഫ് വരുമെന്നും അഡ്വ.ശിവദാസന് നായര് പറഞ്ഞു.
അഞ്ചു വര്ഷം പണിതിട്ടും പത്തനംതിട്ട കെ.എസ്.ആര്.ടി.സി ബസ്സ് ടെര്മിനലിന്റെ പണി കഴിഞ്ഞിട്ടില്ല. കോഴഞ്ചേരി പാലം പാതിവഴിയില് കിടക്കുകയാണ്. അബാന് ജംഗ്ഷനിലെ മേല്പ്പാലം കടലാസിലാണ്. കഴിഞ്ഞ അഞ്ചുവര്ഷം ഭരണം ഉണ്ടായിരുന്നിട്ടും സ്വന്തമായി വികസന പദ്ധതികള് ആവിഷ്കരിച്ചു നടപ്പിലാക്കുവാന് ഇടതുപക്ഷ സര്ക്കാരിന് കഴിഞ്ഞില്ല. യു.ഡി.എഫ് കൊണ്ടുവന്ന പദ്ധതികള് പൂര്ത്തിയാക്കി അതിന്റെ പിതൃത്വം എടുക്കുകയാണ് എല്.ഡി.എഫ് ചെയ്തത്. തെരഞ്ഞെടുപ്പ് മുന്നില് കണ്ടുകൊണ്ട് കുറെയധികം പദ്ധതികള് പ്രഖ്യാപിക്കുകയും ചിലതിന്റെയൊക്കെ നിര്മ്മാണ ഉദ്ഘാടനം നടത്തുകയുമാണ് ചെയ്തത്. ആറന്മുള മണ്ഡലത്തില് എം.എല്.എ ഫണ്ട് വിനിയോഗിക്കുന്നതിലും തികഞ്ഞ പരാജയമായിരുന്നു. കോണ്ഗ്രസ് നേതാക്കളോടും പ്രവര്ത്തകരോടും വാശിതീര്ക്കാന് നടന്നപ്പോള് മണ്ഡലത്തിലെ വികസനം കടലാസിലും ഫെയിസ് ബുക്കിലും മാത്രമായി മാറി.
പത്തനംതിട്ട നഗരം വികസിക്കണം, ഗതാഗത തിരക്കുകൊണ്ട് വീര്പ്പുമുട്ടുകയാണ് ജില്ലാ ആസ്ഥാനം. സന്ധ്യകഴിഞ്ഞാല് ബസ്സ് സര്വീസ് പോലും ഇല്ലാത്ത നാടാണ് പത്തനംതിട്ട. ഇതിനൊക്കെ പരിഹാരം ശാശ്വതമായ പരിഹാരം ഉണ്ടാകണമെന്നാണ് തന്റെ ആത്മാര്ഥമായ ആഗ്രഹമെന്നും ശിവദാസന് നായര് പറഞ്ഞു.