കണ്ണൂര് : അഞ്ചരക്കണ്ടി പുഴയിലെ അശാസ്ത്രീയ ബണ്ട് ഉടന് നീക്കം ചെയ്യണമെന്ന് കെ സുധാകരന് എം.പി ആവശ്യപ്പെട്ടു. അഞ്ചരക്കണ്ടി പുഴയില് പാറപ്പുറത്തെ റഗുലേറ്റര് കം ബ്രിഡ്ജിന്റെ നിര്മ്മാണവുമായി ബന്ധപ്പെട്ട് അശാസ്ത്രീയമായാണ് ബണ്ട് നിര്മ്മിച്ചിരിക്കുന്നത്. ഇത് മൂലം പുഴയില് നീരൊഴുക്ക് തടസ്സപ്പെട്ടിരിക്കുകയാണ്. ബണ്ട് ഉടന് നീക്കം ചെയ്ത് പുഴയുടെ സ്വാഭാവിക ഒഴുക്ക് പുന:സ്ഥാപിച്ച് പ്രദേശത്തെ ജനങ്ങളുടെ ജീവന് ഭീഷണിയായ അവസ്ഥ അടിയന്തിരമായി പരിഹരിക്കണമെന്നും കെ സുധാകരന് എം.പി ജില്ലാ കളക്ടര്ക്ക് നല്കിയ കത്തിലൂടെ ആവശ്യപ്പെട്ടു.
അഞ്ചരക്കണ്ടി പുഴ മണ്ണിട്ട് നികത്തി സ്വാഭാവിക നീരൊഴുക്ക് തടസപ്പെടുത്തിയതിനാല് പിണറായി, വേങ്ങാട്, പെരളശ്ശേരി പഞ്ചായത്തുകളിലെ ജനങ്ങളുടെ ജീവിതം ആഴ്ചകളായി ദുരിത പൂര്ണമാണ്. പിണറായി , വേങ്ങാട്, പെരളശ്ശേരി പഞ്ചായത്തുകളിലെ കര്ഷകരുടെ കൃഷിയിടങ്ങളിലേക്ക് വെള്ളം കയറി വെള്ളകെട്ട് രൂപാന്തരപ്പെട്ട് നില്ക്കുന്നതിനാല് ലക്ഷക്കണക്കിന് രൂപയുടെ കൃഷിനാശമാണ് രണ്ടാഴ്ചക്കകത്ത് ഉണ്ടായിരിക്കുന്നത്.
കൂടാതെ ഈ പ്രദേശത്തെ വീടുകളുടെ സുരക്ഷിതത്വത്തിനും ഭീഷണി നേരിടുകയാണ്. മമ്പ്രം ടൗണ് പ്രദേശം, കീഴത്തൂര് തൂക്കുപാലത്തിനു സമീപമുള്ള പ്രദേശങ്ങള്, അഞ്ചരക്കണ്ടി പുഴയുടെ തീരപ്രദേശങ്ങള് ഉള്പ്പെടെയുള്ള മേഖലകള് പ്രളയ ഭീഷണിയിലുമാണ് . വെള്ളം ഒഴുകിപ്പോകാതെ കെട്ടിക്കിടക്കുന്നതിനാല് ഈ പ്രദേശങ്ങളിലെ ഒട്ടേറെ വീട്ടുകാര് സ്വന്തം വീട് വിട്ട് കുടുംബ വീടുകളിലും മറ്റ് വീടുകളിലും അഭയം തേടിയിരിക്കുകയാണ്. വിദ്യാലയങ്ങള് പോലും തുറന്ന് പ്രവര്ത്തിപ്പിക്കാന് പറ്റാത്ത സാഹചര്യമാണ് നിലവിലുള്ളതെന്നും കെ സുധാകരന് എം.പി പറഞ്ഞു.