കണ്ണൂര്: കണ്ണൂര് ട്രെയിന് തീവെപ്പ് കേസില് എന്ഐഎ അന്വേഷണം ആവശ്യപ്പെട്ട് കെപിസിസി അധ്യക്ഷന് കെ സുധാകരന്. അടിക്കടി ഉണ്ടാകുന്ന തീവെപ്പ് സംഭവങ്ങള് ദുരൂഹമാണ്. സംശയം ദുരീകരിക്കാന് എന്ഐഎ അന്വേഷണമാണ് നല്ലതെന്ന് പറഞ്ഞ കെ സുധാകരന്, റെയില്വേ സ്റ്റേഷനുകളില് സുരക്ഷ കൂട്ടണമെന്നും ആര്ക്കും എപ്പോളും കേറി വരാവുന്ന സ്ഥിതി മാറണമെന്നും ആവശ്യപ്പെട്ടു.
അതേസമയം രാജ്യം കണ്ട ഏറ്റവും ദാരുണമായ ട്രെയിന് അപകടങ്ങളിലൊന്നാണ് ഒഡീഷയില് സംഭവിച്ചിരിക്കുന്നതെന്ന് കെ സുധാകരന് പറഞ്ഞു. റെയില്വേയുടെ ഭാഗത്തുനിന്ന് ഗുരുതരമായ വീഴ്ചയാണ് സംഭവിച്ചിരിക്കുന്നത്. അപകടത്തിന്റെ ധാര്മിക ഉത്തരവാദിത്തം ഏറ്റെടുത്ത് കേന്ദ്ര റെയില്വേ മന്ത്രി രാജിവെക്കേണ്ടതാണ്. അപകടത്തില് രക്ഷാപ്രവര്ത്തനം നടത്തുവാനും പരിക്കേറ്റവര്ക്ക് ചികിത്സ ലഭ്യമാക്കുവാനും അധികാരികള് പരാജയപ്പെട്ടിരിക്കുന്നു എന്നത് അപലപനീയമാണെന്ന് സുധാകരന് പറഞ്ഞു.
