തിരുവനന്തപുരം: കെ.പി.സി.സി പ്രസിഡന്റ് കെ. സുധാകരന്റെ വിവാദപരാമര്ശം താന് അറിഞ്ഞിട്ടില്ലെന്ന് പ്രതിപക്ഷ നേതാവ് വി.ഡി സതീശന്. പരാമര്ശം പരിശോധിച്ച ശേഷം പ്രതികരിക്കാമെന്നും ഏത് സാഹചര്യത്തിലാണ് കെ. സുധാകരന് അത്തരം പരാമര്ശം നടത്തിയതെന്ന് അറിയില്ലെന്നും വി.ഡി സതീശന് പറഞ്ഞു. ഒരു നിയോജകമണ്ഡലത്തിലെ ഉപതെരഞ്ഞെടുപ്പിന് ചങ്ങലപൊട്ടിച്ച് വന്ന നായയെപ്പോലെ മുഖ്യമന്ത്രി ഇറങ്ങി നടക്കുകയാണെന്നായിരുന്നു കെ. സുധാകരന്റെ പരാമര്ശം. ഇത് സംസ്കാരശൂന്യമായ നടപടിയാണെന്ന് എല്.ഡി.എഫ് കണ്വീനര് ഇ.പി ജയരാജന് ചൂണ്ടിക്കാട്ടിയിരുന്നു.
മുഖ്യമന്ത്രിയെ നീചമായ വാക്കുകൊണ്ട് ആക്ഷേപിച്ചത് കേരളത്തിലെ ജനങ്ങളെ അപമാനിക്കുന്നതിന് തുല്യമാണ്. കെ.പി.സി.സി പ്രസിഡന്റിനെതിരെ നടപടി വേണമെന്നും അദ്ദേഹം ആവശ്യപ്പെട്ടിരുന്നു.
തൃക്കാക്കര തെരഞ്ഞെടുപ്പ് പ്രചാരണത്തിലെ ഇടതുപക്ഷ മുന്നേറ്റം കോണ്ഗ്രസ് നേതാക്കളുടെ സമനില തെറ്റിച്ചെന്നും ഇത്തരം പരാമര്ശങ്ങള് സമാധാനപരമായി നടക്കുന്ന തെരഞ്ഞെടുപ്പിനെ വഷളാക്കാനുള്ള ശ്രമമാണെന്നും ഇ.പി ജയരാജന് ആരോപിച്ചു. മുഖ്യമന്ത്രിയെ നീചമായി അധിക്ഷേപിച്ചതില് അണികള് വികാരം കൊള്ളരുതെന്നും അതേ ഭാഷയില് പ്രതികരിക്കരുതെന്നും അദ്ദേഹം ആഹ്വാനം ചെയ്തിരുന്നു.
