തിരുവനന്തപുരം : നിയമസഭ തെരഞ്ഞെടുപ്പില് കേന്ദ്രമന്ത്രി വി. മുരളീധരന് മത്സരിക്കേണ്ടെന്ന് ബിജെപി കേന്ദ്രനേതൃത്വത്തിന്റെ തീരുമാനം. പ്രചാരണത്തിന് നേതൃത്വം നല്കാനും മുരളീധരനോട് കേന്ദ്രനേതൃത്വം ആവശ്യപ്പെട്ടു. തിരുവനന്തപുരത്തെ കഴക്കൂട്ടം നിയോജക മണ്ഡലത്തില് നിന്ന് മുരളീധരന് മത്സരിക്കുമെന്നായിരുന്നു നേരത്തെ പാര്ട്ടിയ്ക്കകത്തെ ധാരണ. 2016ലെ നിയമസഭ തെരഞ്ഞെടുപ്പില് കടകംപളളി സുരേന്ദ്രനോട് പരാജയപ്പെട്ട ശേഷം കഴിഞ്ഞ അഞ്ച് വര്ഷമായി മുരളീധരന് കഴക്കൂട്ടം കേന്ദ്രീകരിച്ചാണ് പ്രവര്ത്തനങ്ങള് നടത്തിവന്നിരുന്നത്. അതിനിടെയാണ് മുരളീധരന് മത്സരിക്കേണ്ടെന്ന് കേന്ദ്രനേതൃത്വത്തിന്റെ തീരുമാനം പുറത്തു വരുന്നത്.
അതേസമയം കെ. സുരേന്ദ്രന് കോന്നിയില് മത്സരിക്കും. വിജയ സാധ്യത കുറഞ്ഞതിനാല് മഞ്ചേശ്വരത്ത് മത്സരിക്കേണ്ടതില്ലെന്നാണ് നിലവിലെ ധാരണ. കേന്ദ്ര പാര്ലമെന്ററി ബോര്ഡ് യോഗം ചേര്ന്ന ശേഷമായിരിക്കും ബി ജെ പിയുടെ അന്തിമ സ്ഥാനാര്ത്ഥി പട്ടിക പുറത്തുവരിക. ഇന്ന് തിരുവനന്തപുരത്തെത്തുന്ന കേന്ദ്രമന്ത്രി അമിത് ഷായ്ക്ക് ആദ്യപട്ടിക കൈമാറും. തുടര്ന്ന് അമിത് ഷായുടെ അനുമതിയോടെ നാളെ തന്നെ പ്രാഥമിക ധാരണയുണ്ടാക്കും.
എന്നാല് വിജയ യാത്രയ്ക്കിടെ ഇന്നലെ ബി ജെ പി സംസ്ഥാന കോര് കമ്മിറ്റി ചേര്ന്ന് സ്ഥാനാര്ത്ഥി പട്ടിക സംബന്ധിച്ച് ചര്ച്ച നടത്തിയിരുന്നു. വിജയ യാത്രയുടെ സ്വീകരണസമ്മേളനങ്ങള് നിര്ത്തിവെച്ച് നടത്തിയ കോര് കമ്മിറ്റി, സമയക്കുറവ് മൂലം ചര്ച്ച പൂര്ത്തിയാക്കാതെയാണ് പിരിഞ്ഞത്. ശനിയാഴ്ച വീണ്ടും കോര് കമ്മിറ്റി യോഗം ചേരുന്നുണ്ട്. ഇ ശ്രീധരന് തൃശൂരില് മത്സരിക്കാനാണ് സാദ്ധ്യത. ഇവിടെ മുതിര്ന്ന സംസ്ഥാന നേതാവിന് സംഘടനാ ചുമതല നല്കും. കുമ്മനം രാജശേഖരന് നേമത്തും പി കെ കൃഷ്ണദാസ് കാട്ടാക്കടയിലും എം ടി രമേശ് കോഴിക്കോട് നോര്ത്തിലും മത്സരിക്കും.
