കണ്ണൂര്: പി.ജയരാജന് സി.പി.എം സീറ്റ് നിഷേധിച്ചതില് പ്രതിഷേധിച്ച് കണ്ണൂര് സ്പോര്ട്സ് കൗണ്സില് വൈസ് പ്രസിഡന്റ് സ്ഥാനത്തു നിന്ന് എം. ധീരജ് കുമാര് രാജിവെച്ചു. കണ്ണൂരില് ഏറ്റവും ജനകീയനായ നേതാവിനെ ഒതുക്കുന്ന സി.പി.എം. നേതൃത്വത്തിന്റെ നിലപാട് അംഗീകരിക്കാന് കഴിയാത്തതിനാലാണ് രാജിയെന്ന് ധീരജ് കുമാര് പറഞ്ഞു. പി.ജയരാജന് സീറ്റ് നിഷേധിച്ചത് നീതികേടാണ്. രാജിയില് പി.ജയരാജന് പങ്കില്ല. സ്വന്തം തീരുമാനമാണ്. പാര്ട്ടി അംഗത്വത്തില് നിന്ന് രാജിവെക്കുന്നില്ലെന്ന് പാര്ട്ടി പള്ളിക്കുന്ന് ബ്രാഞ്ച് അംഗം കൂടിയായ ധീരജ് പറഞ്ഞു.
2014 ലാണ് ബി.ജെ.പി- ആര്.എസ്.എസ് ബന്ധം ഉപേക്ഷിച്ച് ധീരജ് സി.പി.എമ്മില് എത്തിയത്. കണ്ണൂര് തളാപ്പ് അമ്പാടിമുക്കില് ധീരജിന്റെ നേതൃത്വത്തില് 50 ലേറെ ബി.ജെ.പി ക്കാരാണ് അന്ന് സി.പി.എമ്മില് ചേര്ന്നത്. അമ്പാടിമുക്ക് സഖാക്കള് എന്ന പേരിലാണ് ഇവര് സൂഹിക മാധ്യമങ്ങളില് അറിയപ്പെട്ടത്.
ധീരജിനെയും സംഘത്തെയും സി.പി.എമ്മുമായി അടുപ്പിച്ചത് അന്ന് പാര്ട്ടി ജില്ലാ സെക്രട്ടറിയായിരുന്ന പി.ജയരാജനാണ്. പി.ജയരാജനുമായി അടുത്തബന്ധം സൂക്ഷിക്കുന്ന ധീരജ് പി.ജയരാജന്റെ പിന്തുണയിലാണ് കണ്ണൂര് സ്പോര്ട്സ് കൗണ്സില് വൈസ് പ്രസിഡന്റ് സ്ഥാനത്തേക്ക് തെരഞ്ഞെടുക്കപ്പെട്ടത്.
