തിരുവനന്തപുരം: ഇലന്തൂരിലെ ഇരട്ട നരബലി കേസിലെ പ്രതിക്ക് മതഭീകരവാദ സംഘടനകളുമായി ബന്ധമുണ്ടെന്ന് കെ.സുരേന്ദ്രന്.കൃത്യമായ ആസൂത്രണത്തോടെ നടപ്പിലാക്കിയ ഈ കുറ്റകൃത്യം വെറും നരബലിയല്ല. ഇതിനു പിന്നില് തീവ്രവാദ സംഘടനാ സ്വാധീനം ഉണ്ടെന്ന് ബിജെപി വിശ്വസിക്കുന്നു.നരബലിയെ കുറിച്ച് സമഗ്രമായ അന്വേഷണം നടത്തണം. അത്യന്തം ക്രൂരമായ സംഭവമാണിത്. ഇതിനു പിന്നില് സിപിഎം പ്രവര്ത്തകനാണെന്നതു സംഭവത്തിന്റെ ഗൗരവം വര്ധിപ്പിക്കുന്നു. മതഭീകരവാദികളുടെ ശൈലിയില് നടന്ന കൊലപാതകമാണിത്. അത്തരം ശക്തികളുണ്ടെങ്കില് അവരെ പുറത്തെത്തിക്കണം. ലോകത്തിന് മുന്പില് നാടിന്റെ പ്രതിഛായ തകര്ന്നു.
പ്രതി മുഹമ്മദ് ഷാഫിയെ കുറിച്ച് മനസ്സിലായ കാര്യങ്ങള് തുറന്നുപറയാന് പൊലീസ് തയാറാകണം. മനുഷ്യമനസ്സാക്ഷിയെ നടുക്കിയ നരബലിയാണിത്. ഈ സംഭവം കേരള സമൂഹത്തെ ഇരുത്തിച്ചിന്തിപ്പിക്കണം.
ഉത്തരവാദപ്പെട്ട പൊതുപ്രവര്ത്തകനും സിപിഎം നേതാവുമാണ് ഒരു പ്രതി. ഭരണകക്ഷിയും അവരുടെ നേതാവും ശരിയായ അഭിപ്രായം പറയാന് തയാറാകാത്തത് എന്തുകൊണ്ടാണ്?
സിപിഎം എന്തുകൊണ്ടാണു പ്രതി ഭഗവല് സിങ്ങിനെതിരെ നടപടി എടുക്കാത്തത്? കേരളത്തിന് പുറത്തായിരുന്നു ഇത്തരമൊരു സംഭവമെങ്കില് എങ്ങനെയാകുമായിരുന്നു ഇവിടുത്തെ പ്രതികരണങ്ങള്? നമ്മുടെ നാട്ടിലെ സാംസ്കാരിക നായകര് എവിടെ പോയി? അര്ബന് നക്സലുകളും മെഴുകുതിരി പ്രകടനങ്ങളും എവിടെയെന്നും സുരേന്ദ്രന് ചോദിച്ചു.
