കല്പറ്റ : സുല്ത്താന് ബത്തേരി തെരഞ്ഞെടുപ്പ് കോഴക്കേസില് ബിജെപി സംസ്ഥാന അധ്യക്ഷന് കെ.സുരേന്ദ്രന് തിരിച്ചടി. കോഴക്കേസുമായി ബന്ധപ്പെട്ട ശബ്ദ പരിശോധന കേന്ദ്ര സര്ക്കാര് ലാബില് നടത്തണമെന്ന ആവശ്യം തള്ളി. ഇതോടെ ശബ്ദ പരിശോധന സംസ്ഥാന സര്ക്കാറിനു കീഴിലുള്ള ഫോറന്സിക് ലാബില് തന്നെ നടത്തും. സുല്ത്താന് ബത്തേരി ജുഡീഷ്യല് ഒന്നാം ക്ലാസ് മജിസ്ട്രേറ്റ് കോടതിയുടേതാണ് ഉത്തരവ്. സുല്ത്താന് ബത്തേരി കോഴക്കേസുമായി ബന്ധപ്പെട്ട ശബ്ദ പരിശോധന കേന്ദ്ര സര്ക്കാറിനു കീഴിലുള്ള ഫോറന്സിക് ലബോറട്ടറിയില് നടത്തണമെന്ന ആവശ്യം ഉന്നയിച്ച് അഭിഭാഷകന് മുഖേന, സുരേന്ദ്രന് ബത്തേരി ജുഡീഷ്യല് ഒന്നാം ക്ലാസ് മജിസ്ട്രേറ്റ് കോടതിയില് ഹരജി നല്കിയിരുന്നു. ഈ ഹരജിയാണ് തള്ളിയത്.
കോടതി ഉത്തരവിനെ തുടര്ന്ന് ഒക്ടോബര് 11ന് സുരേന്ദ്രനും കേസിലെ മുഖ്യസാക്ഷി പ്രസീത അഴീക്കോടും കാക്കനാട് ചിത്രാഞ്ജലി സ്റ്റുഡിയോയിലെത്തി ശബ്ദ സാമ്പിള് നല്കിയിരുന്നു. കേസ് അന്വേഷിക്കുന്ന വയനാട് ക്രൈം ബ്രാംഞ്ച് നല്കിയ ഹരജിയെ തുടര്ന്നായിരുന്നു ഉത്തരവ്. ശബ്ദ സാമ്പിള് ശേഖരിച്ച് സംസ്ഥാന ഫോറന്സിക് സയന്സ് ലബോറട്ടറിയില് പരിശോധന നടത്താന് അനുമതി തേടിയാണ് ക്രൈം ബ്രാഞ്ച് സംഘം കോടതിയെ സമീപിച്ചത്.
എന്നാല്, സംസ്ഥാനത്തെ ലാബുകളേക്കാള് വിശ്വാസ്യത കേന്ദ്ര സര്ക്കാറിനു കീഴിലുള്ള ഫോറന്സിക് ലാബുകള്ക്കാണെന്നും സംസ്ഥാനത്തെ ലാബുകളില് കൃത്രിമം നടത്താനുള്ള സാധ്യതയുണ്ടെന്നും ചൂണ്ടിക്കാട്ടിയാണ് സുരേന്ദ്രന് കോടതിയില് ഹരജി നല്കിയത്. നിയമസഭ തെരഞ്ഞെടുപ്പില് സുല്ത്താന് ബത്തേരി മണ്ഡലത്തില് എന്.ഡി.എ സ്ഥാനാര്ത്ഥിയാകാന് സുരേന്ദ്രന് ജനാധിപത്യ രാഷ്ട്രീയ പാര്ട്ടി (ജെ.ആര്.പി) സംസ്ഥാന അധ്യക്ഷ സി.കെ ജാനുവിന് 35 ലക്ഷം രൂപ കോഴ നല്കിയെന്നാണ് കേസ്. കേസില് സുരേന്ദ്രന് ഒന്നാം പ്രതിയും ജാനു രണ്ടാം പ്രതിയുമാണ്.
