ഒറ്റപ്പാലം : കടമ്പിഴിപ്പുറം ഇരട്ടക്കൊലപാതകം പ്രതി അറസ്റ്റില്‍.കടന്പഴിപ്പുറം കണ്ണുകുറുശി ഉണ്ണീരിക്കുണ്ടില്‍ രാജേന്ദ്രന്‍ (49) ആണ് ക്രൈംബ്രാഞ്ചിന്‍റെ പിടിയിലായത്. വടക്കേക്കര ചീരപ്പത്ത് വീട്ടില്‍ ഗോപാലകൃഷ്ണനും (62) ഭാര്യ തങ്കമണിയും (52) വീട്ടിലെ കിടപ്പുമുറിയില്‍ കൊല ചെയ്യപ്പെട്ട കേസിലാണ് അയല്‍വാസി കൂടിയായ രാജേന്ദ്രന്‍ അറസ്റ്റിലായത്. 2016 നവംബര്‍ 15 നാണ് ഇരുവരേയും വീട്ടിലെ കിടപ്പുമുറിയില്‍ വെട്ടേറ്റുമരിച്ച നിലയില്‍ കണ്ടെത്തിയത്. കേസില്‍ വര്‍ഷങ്ങള്‍ കഴിഞ്ഞിട്ടും കേസില്‍ പ്രതികളെ പിടികൂടാനാകാത്തത് ആഭ്യന്തര വകുപ്പിനും പോലീസ് സേനയ്ക്കും നാണക്കടായിരുന്നു.
ദമ്പതികള്‍ തനിച്ചുതാമസിച്ചിരുന്ന വീട്ടിലെ കിടപ്പുമുറിയില്‍ അര്‍ധരാത്രിയിലായിരുന്നു അതിദാരുണമായ കൊലപാതകം. ഒറ്റനോട്ടത്തില്‍ മോഷണശ്രമമാണെന്നു തോന്നിയിരുന്നെങ്കിലൂം അതിവിദഗ്ധമായ രീതിയില്‍ നടന്ന കൊലപാതകത്തില്‍ യാതൊരു തെളിവും ലഭിക്കാതായതു പോലീസിനെ ഏറെ കുഴക്കിയിരുന്നു. ആദ്യം ലോക്കല്‍ പോലീസ് അന്വേഷിച്ച കേസ് യാതൊരു തുമ്പും ലഭിക്കാതെ വന്നതോടെ നാട്ടുകാരുടെയും വിവിധ സംഘടനകളുടെയും പ്രതിഷേധത്തെത്തുടര്‍ന്നു ക്രൈംബ്രാഞ്ച് ഏറ്റെടുക്കുകയായിരുന്നു. ഇതിനോടകം കേസില്‍ 185 പേരുടെ മൊഴി രേഖപ്പെടുത്തിയിരുന്നു.
സംഭവ സ്ഥലത്തുനിന്നു ലഭിച്ച വിരലടയാളങ്ങള്‍ ക്രൈം റിക്കാര്‍ഡ്സ് ബ്യൂറോയുടെ സഹായത്തോടെ പരിശോധിച്ചിരുന്നു. പ്രദേശത്തെ മുഴുവന്‍ ഫോണ്‍വിളികളുടെയും വിവരങ്ങളും അന്വോഷണത്തിന്‍റെ ഭാഗമായി പരിശോധിച്ചു. തമിഴ്നാട്ടിലെ വിവിധ സ്ഥലങ്ങളിലേക്കും അന്വേഷണം വ്യാപിപ്പിച്ചിരുന്നു. സാങ്കേതിക വിദഗ്ധരുടെ സഹായത്തോടെ പ്രതികളെ കണ്ടെത്താന്‍ ക്രൈംബ്രാഞ്ച് നടത്തിയ നീക്കമാണ് വിജയിച്ചതെന്നാണ് സൂചന. ക്രൈംബ്രാഞ്ച് അന്വേഷണവും ഫലപ്രദമല്ലാത്തതിനാല്‍ കേസ് സിബിഐ ഏറ്റെടുത്ത് അന്വേഷിക്കണമെന്ന് ആവശ്യപ്പെട്ട് സംയുക്ത സമരസമിതി ഹൈക്കോടതിയെ സമീപിക്കാന്‍ നടപടികള്‍ തുടങ്ങിയിരുന്നു. ഇതിനിടയിലാണ് പ്രതിയെ അറസ്റ്റ് ചെയ്തത്.
