കാക്കനാട് : ഓയോ അപ്പാര്ട്ട്മെന്റുകള് കേന്ദ്രീകരിച്ചുള്ള എം.ഡി.എം.എ വില്പന കേസില് മുഖ്യപ്രതികളില് ഒരാളായ ചെന്നൈ തൊണ്ടിയാര്പേട്ട് സ്വദേശി ഷംസുദ്ദീന് സേഠ് (56) പിടിയില്. മധുര സിക്കമംഗലത്ത് ഒളിവില് കഴിഞ്ഞിരുന്ന ഇയാള് കുടുംബവുമായി രക്ഷപ്പെടാനുള്ള തയാറെടുപ്പുകള് നടത്തുന്നതിനിടെയാണ് എക്സൈസ് ക്രൈംബ്രാഞ്ചിന്റെ പിടിയിലായത്. ചെന്നൈ ട്രിപ്ലിക്കന്സില് തങ്ങിയ കാക്കനാട് എം.ഡി.എം.എ കേസിലെ പ്രതികള്ക്ക് മയക്കുമരുന്ന് കൈമാറിയത് മൊത്തക്കച്ചവടക്കാരനായ ഷംസുദ്ദീന് ആയിരുന്നു. മാസങ്ങളായി നടത്തിയ അന്വേഷണത്തിനൊടുവിലാണ് എക്സൈസ് ക്രൈംബ്രാഞ്ച് അസി.കമീഷണര് ടി.എം കാസിമിന്റെ നേതൃത്വത്തിലുള്ള സംഘം ഇയാളെ കുടുക്കിയത്.
കാരക്കല്, നാഗൂര് എന്നിവിടങ്ങളില് ഒളിവില് കഴിഞ്ഞിരുന്ന ഷംസുദ്ദീന് സേഠ് കഴിഞ്ഞ ദിവസം മധുരയിലെ ബന്ധുവീട്ടില് എത്തിയതായി ക്രൈം ബ്രാഞ്ച് ജോയന്റ് എക്സൈസ് കമീഷണര് കെ.എ നെല്സണിന് രഹസ്യ വിവരം ലഭിച്ചിരുന്നു. തുടര്ന്ന് നടത്തിയ അന്വേഷണത്തിലാണ് ഷംസുദ്ദീന് കുടുങ്ങിയത്. ഈ കേസില് 25ാം പ്രതിയായ ഇയാള്ക്കായി ചെന്നൈ കസ്റ്റംസ് യൂനിറ്റും അന്വേഷണം നടത്തിയിരുന്നു. കൊച്ചിയില് എത്തിച്ചു നടത്തിയ ചോദ്യം ചെയ്യലില് മലയാളികള്ക്കടക്കം നിരവധിപ്പേര്ക്ക് മയക്കുമരുന്ന് കൈമാറിയിട്ടുണ്ടെന്ന് ഇയാള് മൊഴി നല്കി. സര്ക്കിള് ഇന്സ്പെക്ടര് കെ.വി സദയകുമാര്, എക്സൈസ് ഇന്സ്പെക്ടര് ടി.ജി കൃഷ്ണകുമാര്, പ്രിവന്റീവ് ഓഫിസര് എം.എ യൂസഫലി, ഷിജു ജോര്ജ് എന്നിവര് അന്വേഷണ സംഘത്തിലുണ്ടായിരുന്നു.
