ചെറുതുരുത്തി : കേരള കലാമണ്ഡലം കല്പിത സര്വകലാശാല ഭരണസമിതി ഹൈകോടതി വിധി മറികടന്ന് പിന്വാതില് വഴി നിയമിച്ച ആറു താല്ക്കാലിക ജീവനക്കാരെ സ്ഥിരപ്പെടുത്താന് നീക്കം നടത്തുന്നെന്ന ആരോപണവുമായി യൂത്ത് കോണ്ഗ്രസ്. ഇതുസംബന്ധിച്ച് ചേലക്കര നിയോജക മണ്ഡലം വൈസ് പ്രസിഡന്റ് ആറ്റൂര് പാലക്കാട്ടുതൊടിയില് പി.പി പ്രസാദ് സാംസ്കാരിക വകുപ്പ് സെക്രട്ടറിക്ക് പരാതി നല്കി. ഹൈകോടതി വിധിയുടെ പകര്പ്പടക്കം ഹാജരാക്കി.
കലാമണ്ഡലത്തിലെ താല്ക്കാലിക ജീവനക്കാരെ മാനദണ്ഡങ്ങള് ലംഘിച്ച് സ്ഥിരപ്പെടുത്തുന്നെന്ന പരാതിയുമായി പ്രസാദ് ഹൈകോടതിയെ സമീപിച്ചിരുന്നു. ഇതേത്തുടര്ന്ന് 2020 ആഗസ്റ്റ് 19ന് സ്ഥിരപ്പെടുത്തല് കോടതി തടഞ്ഞു. ഈ മാസം അഞ്ചിന് ഈ ഉത്തരവില് കോടതി ഭേദഗതി വരുത്തി. തുടര്ന്ന് പ്രസാദ് ഡിവിഷന് ബെഞ്ചില് റിട്ട് അപ്പീല് സമര്പ്പിച്ചു. ഇതിലെ വിധി പ്രകാരം കലാമണ്ഡലം കല്പിത സര്വകലാശാല ആകുന്നതിനുമുമ്പ് താല്ക്കാലികമായി നിയമിച്ചവരെ മാത്രമേ സ്ഥിരപ്പെടുത്താന് പാടുള്ളൂവെന്ന വിധി വന്നു. ഇത് അംഗീകരിച്ച് കലാമണ്ഡലം കോടതിയില് സത്യവാങ്മൂലവും സമര്പ്പിച്ചു. എന്നാല്, അത് ലംഘിച്ച് ഇപ്പോള് നിയമനം നടത്തുന്നുവെന്നും കോടതിവിധിക്കു പുറത്തുള്ള ആറുപേരെ സ്ഥിരപ്പെടുത്തുന്നത് തടയണമെന്നും പ്രസാദ് നല്കിയ പരാതിയില് ആവശ്യപ്പെടുന്നു.
