തിരുവനന്തപുരം : കളമശ്ശേരി മെഡിക്കല് കോളജിനെതിരെ ഉയര്ന്ന പരാതികള് തള്ളി മുഖ്യമന്ത്രി. ആരോപണങ്ങള് വസ്തുതാപരമല്ലെന്ന് സമൂഹത്തിന് ബോധ്യമായിട്ടുണ്ട്. ഓക്സിജന് ട്യൂബ് മാറിക്കിടക്കാനുള്ള സാധ്യതയില്ല. ഒറ്റപ്പെട്ടതെങ്കിലും വ്യാജപ്രചാരണവുമായി ചിലര് രംഗത്തുണ്ട്. ഇത് സര്ക്കാര് ഗൗരവമായിട്ടാണ് കാണുന്നതെന്നും മുഖ്യമന്ത്രി വ്യക്തമാക്കി.
എന്നാല്, കളമശ്ശേരി മെഡിക്കല് കോളജിലെ കോവിഡ് ഐ.സി.യുവിലുണ്ടായ ചികില്സാ പിഴവാണ് സി.കെ. ഹാരിസിന്റെ മരണത്തിനിടയാക്കിയതെന്ന ഉറച്ച നിലപാടിലാണ് ബന്ധുക്കള്. പരാതിയില് ഉറച്ചുനില്ക്കുന്നതായി ബന്ധുകള് പോലീസിന് മൊഴി നല്കി. അതേസമയം കളമശ്ശേരി ആശുപത്രിയിലെ ആര്ക്കെങ്കിലും വീഴ്ചയുണ്ടായിട്ടുണ്ടെങ്കില് മുഖം നോക്കാതെ നടപടി എടുക്കുമെന്ന് മന്ത്രി വി.എസ്.സുനില്കുമാര് പറഞ്ഞു
അതിനിടെ, ആര്.എം. ഒയെ പുറത്താക്കണമെന്നാവശ്യപ്പെട്ട് ബി.ജെ.പി പ്രവര്ത്തകര് ആശുപത്രിക്ക് മുന്നില് ശവപ്പെട്ടി വിതരണ സമരം നടത്തി. യൂത്ത് കോണ്ഗ്രസ് പ്രവര്ത്തകര് ആശുപത്രി കവാടത്തിലേക്ക് ജീവന് രക്ഷാ മാര്ച്ചും നടത്തി.
