എറണാകുളം: കളമശേരി മെഡിക്കല് കോളജില് സംഭവിച്ച ചികിത്സ വീഴ്ച്ച കണ്ടെത്തുന്നതിനായി അന്വേഷണത്തിന് ആരോഗ്യ സെക്രട്ടറി ഉത്തരവിട്ടു. ആരോഗ്യ വിദ്യാഭ്യാസ ഡയറക്ടറേറ്റ് സ്പെഷ്യല് ഓഫീസര് ഡോ.ഹരികുമാരന് നായര്ക്കാണ് അന്വേഷണ ചുമതല. വിശദമായ അന്വേഷണം നടത്തി ഒരാഴ്ച്ചയ്ക്കകം റിപ്പോര്ട്ട് സമര്പ്പിക്കണമെന്നും ഉത്തരവിലുണ്ട്.
കളമശേരി മെഡിക്കല് കോളജില് ഓക്സിജന് ലഭിക്കാതെ കൊവിഡ് രോഗി മരിക്കാനിടയായെന്ന നഴ്സിംഗ് ഓഫീസറുടെയും ജൂനിയര് ഡോക്ടറുടെയും വെളിപ്പെടുത്തലില് വിശദമായ അന്വേഷണം നടത്താനാണ് ആരോഗ്യ വകുപ്പ് തീരുമാനിച്ചിരിക്കുന്നത്. വെന്റിലേറ്റര് ട്യൂബുകള് മാറിക്കിടന്നതിനാലാണ് കൊവിഡ് രോഗി മരിച്ചതെന്ന് നഴ്സിംഗ് ഓഫീസര് ജലജ ദേവിയുടെ ശബ്ദ സന്ദേശമാണ് പ്രശ്നത്തിനിടയാക്കിയത്. പിന്നാലെ വീഴ്ച്ചകള് ശരിവെച്ച് ജൂനിയര് ഡോക്ടര് നജ്മ സലിമും രംഗത്തെത്തിയപ്പോള് ആരോഗ്യ വകുപ്പ് സംശയത്തിന്റെ നിഴലിലായി.
