തിരുവല്ല: ഗുരുവിന്‍റെ നാലു ശിഷ്യര്‍ക്കും ഒന്നാം സ്ഥാനം നേടിയതോടെ കലോത്സവ നഗരിയില്‍ താരമായി കലാമണ്ഡലം നിഖില്‍ മലയാലപ്പുഴ. ഹയര്‍ സെക്കന്‍ഡറി പെണ്‍കുട്ടികളുടെ വിഭാഗത്തില്‍ തൈക്കാവ് ജി.എച്ച്.എസ്.എസിലെ ജെ ഗൗരിനന്ദനയും ഹൈസ്ക്കൂള്‍ വിഭാഗം പെണ്‍കുട്ടികളില്‍ ബഥനി ആശ്രമം സ്കൂള്‍ ചെറുകുളഞ്ഞിയിലെ അക്ഷര ജിനോജ്,ഹൈസ്ക്കൂള്‍ വിഭാഗം ആണ്‍കുട്ടികളില്‍ കിടങ്ങന്നൂര്‍ എസ്.വി.ജി.എച്ച്.എസ്.എസിലെ പി.ഗോപീകൃഷ്ണന്‍,യു.പി വിഭാഗത്തില്‍ എന്‍.എസ്.എസ് യു.പി.എസ് മലയാലപ്പുഴയിലെ എ.വി അഭിനന്ദ് എന്നിവരാണ് ഒന്നാം സ്ഥാനം നേടിയത്.
ഹയര്‍ സെക്കന്‍ഡറിയില്‍ കൃഷ്ണാര്‍ജുന യുദ്ധത്തിലെ ഗയാവധവും യു.പി,എച്ച്.എസ് വിഭാഗത്തില്‍ കല്യാണ സൗഗന്ധികവുമാണ് മത്സരത്തിനായി തിരഞ്ഞെടുത്തത്. പക്കമേളക്കാരായി നാലു പേര്‍ക്കുമൊപ്പം കലാമണ്ഡലം ഹരിദേവ്,കലാമണ്ഡലം അഭിനന്ദ്,കലാമണ്ഡലം അരുണ്‍ എന്നിവരുമുണ്ടായിരുന്നു. മൂന്നു ഉപജില്ലയില്‍ നിന്നാണ് ശിഷ്യര്‍ മത്സരത്തിനെത്തിയത്.
